Bakı, 5 noyabr, AZƏRTAC
Gələn il dövlət büdcəsindən sosial müavinətlərin və təqaüdlərin ödənişi üçün 2,1 milyard manat vəsait ayrılması nəzərdə tutulur. Son beş il ərzində sosial müdafiə və sosial təminat sahəsinə yönəldilən xərclər 40,7 faiz artım nümayiş etdirib.
AZƏRTAC xəbər verir ki, bu fikirləri maliyyə nazirinin müavini Himalay Məmişov Milli Məclisin Əmək və sosial siyasət, eləcə də İqtisadi siyasət, sənaye və sahibkarlıq komitələrinin birgə iclasında “Azərbaycan Respublikasının 2026-cı il dövlət büdcəsi zərfi”nin müzakirəsi zamanı səsləndirib.
Nazir müavini qeyd edib ki, Azərbaycanda vətəndaşların sosial rifahının yüksəldilməsi və sosial təminat sisteminin gücləndirilməsi dövlət siyasətinin prioritet istiqamətlərindən biridir. Həyata keçirilən məqsədyönlü sosial siyasət və maliyyə sabitliyi ölkədə əhalinin sosial müdafiəsinin davamlı şəkildə gücləndirilməsinə xidmət edir.
