Moldova hökumətinin yeni qərarı ilə Kişinyovdakı Rusiya Elm və Mədəniyyət Mərkəzi ("Rus Evi") bağlanıb.
Hurriyyet.az xəbər verir ki, Moldova mediasının məlumatına görə, qərar Aleksandru Muntyanunun rəhbərlik etdiyi yeni Nazirlər Kabinetinin ilk iclasındaca qəbul edilib.
Sənədin layihəsini təqdim edən mədəniyyət naziri Kristian Jardan deyib ki, "Rus Evi" Kişinyovda 30 oktyabr 1998-ci ildə Moskvada imzalanmış Moldova-Rusiya müqaviləsi əsasında açılıb. Hər iki ölkədə mədəni, humanitar və elmi əlaqələri inkişaf etdirmək üçün mədəniyyət mərkəzlərinin yaradılmasını tənzimləyən müqavilə 4 iyul 2001-ci ildə qüvvəyə minib. Lakin 24 fevral 2022-ci ildən sonra "Rusiya Elm və Mədəniyyət Mərkəzi Rusiyanın Moldovaya qarşı hibrid müharibəsində bir vasitə kimi istifadə olunur".
Nazir müqavilənin ləğvini təklif edərkən qeyd edib ki, Moldovanın Rusiyada oxşar mədəniyyət mərkəzi yoxdur: "Sənədin özü ləğv prosedurunu nəzərdə tutmur, lakin onun hər beş ildən bir avtomatik olaraq yenilənməsini nəzərdə tutur. Tərəflərdən biri müqavilənin müddəti bitməzdən ən azı altı ay əvvəl digər tərəfə müqavilənin yenilənməməsi barədə məlumat verərsə, müqavilə ləğv edilir. Hazırkı müqavilə 4 iyul 2026-cı ildə başa çatır. Buna görə də, biz müqaviləni yeniləməməyi təklif edirik".
Hökumətin qərarı yekdilliklə qəbul edilib.
Moldova hökumətinin qərarını şərh edən Rusiya Prezidentinin mətbuat katibi Dmitri Peskov deyib ki, Rusiya hakimiyyəti Kişinyovdakı “Rus Evi”nin bağlanma ehtimalından "təəssüflənir" və Moldova hakimiyyətinin öz vətəndaşlarının maraqlarını "qəsdən görməzdən gəldiyini" düşünür.
Qeyd edək ki, artıq Azərbaycan da daxil olmaqla, bir çox keçmiş SSRİ respublikalarında “Rus evi” bağlanıb.
AzPolitika.info
