ain.az, Olke.az portalına istinadən məlumatı açıqlayır.
Yeni aparılan uzunmüddətli tədqiqat göstərib ki, gündəlik fiziki aktivliyin artırılması alzheimer xəstəliyi ilə əlaqəli beyin dəyişikliklərinin erkən mərhələdə ləngiməsinə kömək edə bilər.
Ölkə.az xəbər verir ki, tədqiqatçılar 14 il ərzində təxminən 300 yaşlı insanı müşahidə ediblər və müəyyən ediblər ki, beyinlərində artıq yüksək miqdarda beta-amiloid (Alzheimerin erkən əlaməti) olan şəxslər fiziki cəhətdən aktiv olduqları halda yaddaş və düşünmə qabiliyyətlərini daha yavaş itirirdilər. Hətta az və ya orta səviyyəli gündəlik hərəkət də müsbət təsir göstərirdi.
Araşdırmaya əsasən, gündə 5000-7500 addım atan şəxslərin zehni qabiliyyətləri, demək olar ki, hərəkətsiz olan insanlara nisbətən iki dəfə daha yavaş azalırdı.
Bununla belə, daha çox hərəkətin əlavə fayda vermədiyi qeyd olunur. Yəni müsbət nəticə əldə etmək üçün mütləq 10 000 addım atmağa ehtiyac yoxdur.
Nature Medicine jurnalında dərc olunan tədqiqat həmçinin göstərib ki, fiziki aktivlik beta-amiloidin yığılmasını ləngitmir. Əvəzində, beyin hüceyrələrinə birbaşa zərər vurduğu düşünülən başqa bir toksik zülal tau zülalının artım sürətini azaldır.
Hazırda ABŞ-da təxminən 7 milyon insan alzheimer xəstəliyindən əziyyət çəkir və bu sayın 2060-cı ilə qədər ikiqat artacağı gözlənilir. Xəstəliyin gedişini ləngidən iki dərman — Lekanemab (Leqembi) və Donanemab (Kisunla) mövcud olsa da, həkimlər hesab edirlər ki, fiziki aktivlik kimi həyat tərzi vərdişləri hələ də ən vacib qoruyucu amillərdəndir.
Bununla belə, tədqiqatın sırf müşahidə xarakterli olması onun fiziki aktivliyin alzheimer xəstəliyinin qarşısını birbaşa aldığını sübut etmədiyini göstərir.
Mütəxəssislər bildirirlər ki, bu nəticələr artmaqda olan elmi dəlilləri bir daha təsdiqləyir hərəkət “dəyişdirilə bilən risk faktoru”dur, yəni insanlar bunu dəyişməklə beyin sağlamlıqlarını yaxşılaşdıra bilərlər.
Həmidə İbrahimova
Hadisənin gedişatını izləmək üçün ain.az saytında ən son yeniliklərə baxın.
