Minuteman III raketi Kaliforniyadan buraxılaraq 4200 mil məsafəni qət edib...
Poliqon xəbər verir ki, ABŞ Hərbi Hava Qüvvələri qitələrarası ballistik raket (QBR) Minuteman III modelinin növbəti sınağını uğurla həyata keçirib. Raket nüvə başlığı olmadan Kaliforniyadakı Vandenberq aviabazasından buraxılıb və təxminən 4200 mil məsafə qət edərək Marşall adalarındakı atolla çatıb.
ABŞ Hərbi Hava Qüvvələrinin açıqlamasında qeyd olunur ki, sınaq Minuteman III sisteminin mövcud etibarlılığını, döyüş hazırlığını və dəqiqliyini qiymətləndirmək məqsədi daşıyıb. Test zamanı ABŞ Hərbi Dəniz Qüvvələrinə məxsus E-6B Mercury təyyarəsindən idarə olunan ALCS (Airborne Launch Control System) – raketlərin ehtiyat komanda və idarəetmə sistemi – işə salınıb və onun operativ səmərəliliyi yoxlanılıb.
Açıqlamada deyilir: “Bu sınaq mövcud QBR sisteminin etibarlılığını və döyüş hazırlığını qiymətləndirməyə, həmçinin ehtiyat idarəetmə sisteminin fasiləsiz fəaliyyətini təsdiqləməyə imkan verdi”.
ABŞ ordusu vurğulayıb ki, bu sınaq planlaşdırılmış illik test proqramının bir hissəsidir və beynəlxalq vəziyyətlə əlaqəli deyil. Lakin analitiklərin fikrincə, bu cür sınaqlar Vaşinqtonun strateji çəkindiricilik qabiliyyətini qorumağa və nüvə qüvvələrinin hazır vəziyyətdə saxlanılmasına xidmət edir.
Minuteman III raketləri ABŞ-ın nüvə triadasının əsas elementlərindən biridir və 1970-ci illərdən bəri xidmət göstərir. Hazırda Pentaqon bu sistemi yeni Sentinel proqramı ilə əvəz etməyə hazırlaşır, lakin keçid mərhələsində Minuteman raketləri hələ də ABŞ-ın strateji arsenalının təməlini təşkil edir.
Poliqon.info
