Bakı, 6 noyabr, AZƏRTAC
Süni intellekt texnologiyalarının sürətli inkişafı fonunda yarımötürücülərin qlobal satışları sabit artım nümayiş etdirir. Yarımötürücü İstehsalçıları Assosiasiyasının (SIA) məlumatına görə, 2025-ci ilin üçüncü rübündə mikroçiplərin satış həcmi 208,4 milyard ABŞ dollarına çatıb ki, bu da ikinci rüblə müqayisədə 15,8% çoxdur.
AZƏRTAC xarici mediaya istinadla xəbər verir ki, təkcə sentyabr ayında yarımötürücülərin satış həcmi 69,5 milyard ABŞ dolları təşkil edib. Bu, 2024-cü ilin eyni dövrü ilə müqayisədə 25,1% çox, cari ilin avqust ayına nisbətən isə 7% artım deməkdir. Statistik məlumatlar “World Semiconductor Trade Statistics” (WSTS) təşkilatı tərəfindən toplanıb və üçaylıq hərəkətli orta göstərici əsasında hesablanıb.
SIA-nın prezidenti və baş icraçı direktoru Con Nyufer qeyd edib ki, qlobal çip bazarı yaddaş və məntiqi mikrosxemlər də daxil olmaqla, geniş çeşiddə yarımötürücü məhsullarına artan tələbat sayəsində sabit bərpa və artım nümayiş etdirir. Onun sözlərinə görə, satışların fəal artımı xüsusilə Asiya-Sakit okean regionunda və hər iki Amerika qitəsində müşahidə olunur.
Regional bölgü üzrə sentyabr ayının yekunlarına əsasən, satışlar Asiya-Sakit okeanı regionunda və digər ölkələrdə 47,9%, Amerikada 30,6%, Çində 15%, Avropada isə 6% artıb. Bununla yanaşı, Yaponiyada gəlirlər 10,2% azalıb.
Aylıq ifadədə ən yüksək satış artımı Amerikada (8,2%) qeydə alınıb, ardınca Asiya-Sakit okean regionu (8%), Çin (6%), Avropa (5,5%) və Yaponiya (1,6%) gəlir.
Yarımötürücü sektorunda gəlir 2023-cü ilin əvvəllərindən etibarən demək olar ki, fasiləsiz olaraq artır. Məhz süni intellektin sürətli inkişafı hesablama çiplərinə, yaddaş mikrosxemlərinə və SSD disklərə olan tələbatı yüksəldib.
SIA Assosiasiyası gəlir həcminə görə ABŞ-ın yarımötürücü istehsalçılarının 99%-ni və bu sahənin ən iri xarici şirkətlərinin təxminən üçdə ikisini birləşdirir.
Yarımötürücü sənayesi dünyanın ən elmi tutumlu sahələrindən biri hesab olunur, belə ki, şirkətlər orta hesabla gəlirlərinin təxminən 18%-ni elmi-tədqiqat və təcrübə-konstruktor işlərinə yönəldirlər ki, bu da digər sənayelərin əksəriyyətindən əhəmiyyətli dərəcədə yüksək göstəricidir.
