APA Holdinqin rəhbəri Vüsalə Mahirqızı “Mediada Azərbaycan ədəbi dilinin normalarının düzgün tətbiqi” mövzusunda konfransda çıxışı zamanı bildirib ki, Azərbaycan dilinin normalarını pozan mətbuat orqanları cərimə olunmalıdır.
Avtosfer.az bu haqda jurnalist, televiziya tənqidçisi, publisist, filologiya elmləri doktoru, Bakı Dövlət Universitetinin professoru Qulu Məhərrəmlinin fikirlərini öyrəndi:
"Əgər mən bilsəydim ki, media qurumu cərimələnəndən sonra o səhvlər təkrar olmayacaq, mən o fikri dəstəkləyərdim. Onsuz da indi camaatı çox şeyə görə cərimə edirlər: maşın saxladın cərimə, yolu düz keçmədin cərimə, işıq cərimə, qaz cərimə və s. Ona görə bu cərimələrin sayını artıranda, bu, çox da gözəl görünmür. Əlbəttə, mediada səhvlər olmasın. Səhvlərin olmamağı üçün də qəzet əməkdaşları, sayt əməkdaşları, xüsusən adminlər və redaktorlar Azərbaycan dilinin qaydalarını yaxşı bilməlidirlər. Qaydaları yaxşı biləndə, əlbəttə, səhvlərdən qaçmaq mümkün olur. Ona görə də indiki halda dil yanlışlıqlarına görə cərimələrin tətbiqi aktual deyil. Yəni bu, məsələdən çıxış yolu deyil. Ona görə də hörmətli Vüsalə xanımın fikrinə mən şərik deyiləm".
