Almaniyanın səhiyyə orqanları Hamburq şəhərinin kanalizasiya suyunda poliovirus izlərinə rast gəlib.
Hələlik heç bir xəstəlik halı qeydə alınmayıb, amma səhiyyə orqanları yoluxmanın izlənməsini və vaksinasiya səylərinin gücləndirilməsini tövsiyə edirlər.
Tapılan virus Avqust ayında Əfqanıstanda müəyyən edilmiş poliovirusla genetik cəhətdən oxşardır. Almaniyada son yerli polio hadisəsi 1990-cı ildə qeydə alınmışdı.
Ümumdünya Səhiyyə Təşkilatı bildirir ki, virus tamamilə aradan qaldırılmayana qədər bütün ölkələr xaricdən gətirilən infeksiyalara qarşı risk altındadır. Poliovirus kanalizasiya sularında immunizasiya olunmuş şəxslərin ifrazatında da görünə bilər.
Avropa üzrə vaksinasiyanın səviyyəsi ölkədən-ölkəyə fərqlidir: 1 yaşlı uşaqlar arasında 79%-dən 99%-dək dəyişir. ECDC bildirir ki, Almaniyada aşkarlanan poliovirusun ümumi risk səviyyəsi “çox aşağı”dır.
Zeynəb Rzayeva
