Ukrayna ordusu Rusiyanın Ryazan şəhərindəki neft emalı zavoduna və işğal olunmuş ərazidəki digər hərbi hədəflərə zərbələr endirib.
Ukrayna Baş Qərargahının məlumatına görə, yerli neft emalı zavoduna zərbə endirilib, partlayışlara və böyük yanğına səbəb olub.
Baş Qərargah bildirib ki, Ryazan neft emalı zavodu benzin, dizel, reaktiv yanacaq, mayeləşdirilmiş qazlar və digər neft məhsulları istehsal edir. O, ildə təxminən 840 min ton TS-1 aviasiya yanacağı istehsal edir ki, bu da Rusiya Aerokosmik Qüvvələri tərəfindən istifadə olunur.
Ryazan qubernatoru Pavel Malkov da hücumu təsdiqləyərək adını çəkmədiyi bir obyektə ciddi zərər dəydiyini bildirib.
Ukrayna qüvvələri həmçinin Krımda Rusiyanın Nebo-U radar stansiyasını, Zaporojye vilayətində Tokmak yaxınlığındakı hərbi qatarı və Xarkov vilayətində Vovçansk yaxınlığındakı Rusiya şəxsi heyətini vurub.
Ukrayna müntəzəm olaraq Rusiyadakı və işğal edilmiş ərazilərdəki neft obyektlərini hədəfə alır və Kiyev bununla Moskvanın hərbi logistika və təchizata ciddi zərbə vurmağı hədəfləyir.
Ukraynanın neft istehsalı və emalı müəssisələrinə davam edən hücumlarının Rusiyanın bəzi bölgələrində benzin çatışmazlığına səbəb olduğu bildirilir.
“Reuters”in məlumatına görə, sentyabr ayında Rusiyanın neft məhsullarının ixracı Ukraynanın davam edən dron hücumlarına görə avqust ayı ilə müqayisədə 17,1% azalaraq 7,58 milyon tona düşüb.
TAHİR
