Ağdam uzun illər boyu Azərbaycanın yaddaşında bir şəhər adı ilə yanaşı, həm də böyük bir nisgilin, talana məruz qalmış yurd həsrətinin simvolu olub. İşğal illəri bu qədim şəhəri susqunlaşdırsa da, onun ruhunu heç vaxt söndürə bilmədi. Ağdam çinarlarının kölgəsində dolaşan xatirələr, dağıdılmış evlərin altında gizlənən uşaqlıq nağılları, uçurulmuş küçələrin hər daşında iz qoymuş həyat sanki bu günü – 20 noyabrı gözləyirdi. Bu tarix Ağdamın taleyinə yeni səhifə gətirdi. Şəhərin azad edilməsi yalnız hərbi-siyasi qələbə deyildi – bu, həm də milli yaddaşın, milli ruhun üzərindən tozun silinməsi idi. Dünyanın “kərpicinə həsrət qalan şəhər” adlandırdığı Ağdam o gün sanki öz səsini geri aldı. İllər boyu viranə qalan küçələr bu gün yenidən canlanır. Bərpa olunan yollar, tikilən evlər, işıqlandırılan məhəllələr Ağdamın dirçəliş salnaməsinin ilk cümlələridir. Burada atılan hər addım, vurulan hər mismar, çəkilən hər xətt bir xalqın “Biz burdayıq!” çağırışıdır. Torpağın yaddaşı uzun olar – o, azadlığı tanıyır, işığı tanıyır və indi bu torpaq yenidən insan nəfəsi ilə isinməyə başlayıb.
Ağdam Cümə məscidinin minarələrindən yüksələn azan səsi öz ağır, kövrək və qürurlu ahəngi ilə illərin susqunluğunu qırır. Bu səs təkcə ibadət çağırışı deyil; bu, bir şəhərin “Mən qayıdıram” deyən səsidir. Ağdamın hər daşına hopmuş o köhnə yaraları indi yeni tikililər, yeni səslər, yeni həyatlar sağaldır. 20 noyabr, sözün ən geniş və ən dərin mənasında, bir şəhərin deyil, bütöv bir xalqın dirçəliş günüdür. Bu tarix Ağdamın külündən doğulan quş kimi qanad açdığı, Azərbaycanın isə qürurla “Heç nə unudulmadı və heç nə bağışlanmadı” deyə bildiyi gündür.
Bu gün Ağdam yenidən yazılır. Yeni yollarla, yeni ümidlərlə, yeni nəfəs və yeni tale ilə. İndi Ağdam təkcə keçmişin ağrıları ilə deyil, gələcəyin işığı ilə danışır. Və biz bu doğuluşun şahidi olmaq şansını yaşayan nəsilik. 20 noyabr – Ağdamın yenidən doğulan səsi, döyünən qəlbi, dirçələn ruhudur.
Səfa Ağayev
YAP İmişli rayon təşkilatının sədri
