ABŞ dövlət katibi: Bu baş verə bilər, amma əmin deyiləm…
Poliqon xəbər verir ki, ABŞ dövlət katibi Marko Rubio Cenevrədə Ukrayna nümayəndə heyəti ilə danışıqlardan sonra keçirdiyi mətbuat konfransında ABŞ Prezidenti Donald Tramp ilə Ukrayna Prezidenti Vladimir Zelenski arasında mümkün telefon danışığı barədə sualı cavablandırıb. Dövlət katibi bildirib ki, belə bir danışığın baş tutması istisna edilmir, lakin bu barədə dəqiq məlumat yoxdur. “Mümkündür, amma əmin deyiləm”, — deyə Rubio qeyd edib.
Bu açıqlama Trampın öz sosial şəbəkəsi Truth Social-də səsləndirdiyi narazılıqlardan sonra gəlib. ABŞ Prezidenti bildirib ki, Ukrayna rəhbərliyi ABŞ-ın münaqişənin nizamlanması üçün göstərdiyi səylərə görə təşəkkür etmir. O, Avropa ölkələrinin hələ də Rusiya neftini almaqda davam etdiyini, ABŞ-ın isə NATO vasitəsilə Ukraynaya böyük həcmdə silah satdığını vurğulayıb.
Tramp paylaşımında həmçinin iddia edib ki, 2020-ci il prezident seçkiləri “saxtalaşdırılmasaydı”, Ukrayna ilə Rusiya arasında mövcud münaqişə heç yaranmazdı. ABŞ liderinin bu fikirləri həm daxildə, həm də beynəlxalq aləmdə geniş rezonans doğurub və Vaşinqtonun Kiyevlə münasibətlərindəki gərginliyi bir qədər də artırıb.
Hazırda ABŞ–Ukrayna danışıqları Cenevrədə intensiv şəkildə davam edir və tərəflərin mövqeləri, xüsusən də təhlükəsizlik zəmanətləri, atəşkəs mexanizmləri və gələcək diplomatik koordinasiya ilə bağlı məsələlər üzərində iş gedir. Ekspertlər hesab edir ki, Tramp və Zelenski arasında ola biləcək telefon danışığı prosesdə mühüm dönüş nöqtəsi ola bilər.
Poliqon.info
