Rusiya Prezidenti Vladimir Putin Yeni Dehlidə keçirilən Rusiya-Hindistan görüşlərindən sonra verdiyi açıqlamada, Rusiyanın Hindistanda RT televiziya kanalının yayıma başladığını elan edib.
"Cebheinfo.az" xəbər verir ki, Putin bildirib ki, yeni kanal hindistanlı tamaşaçıların Rusiyanı daha yaxından tanımasına və ölkədəki hadisələr barədə obyektiv məlumat əldə etməsinə kömək edəcək.
O, həmçinin kanalın iki xalq arasında əsrlərdir mövcud olan mədəni və ənənəvi maraqları daha da gücləndirəcəyini vurğulayıb.
RT-nin verdiyi məlumata görə, “RT India” 2025-ci il dekabrın 5-də Yeni Dehlidə yayıma başlayıb. Kanal gündəlik ingiliscə xəbər buraxılışları təqdim edəcək.
Yayım əsasən Hindistan və Rusiyanın beynəlxalq siyasətdəki rollarına və iki ölkə arasındakı münasibətlərə fokuslanacaq.
Bu addım, Rusiyanın qlobal media şəbəkəsi olan RT-nin (əvvəllər “Russia Today”) yayım coğrafiyasını genişləndirməsi deməkdir.
RT xüsusilə Qərbdə Rusiyanın rəsmi mövqeyini əks etdirən və tez-tez “dövlət təbliğat vasitəsi” kimi tənqid olunan bir kanal kimi tanınır.
Kanal Hindistanın geniş ingilisdilli əhalisinə, xüsusilə təhsilli şəhər əhalisinə və siyasi qərarvericilərə xitab etməyi hədəfləyir.
Lakin kanalın Hindistan tamaşaçıları tərəfindən nə dərəcədə etibarlı və qərəzsiz qəbul ediləcəyi, məhz təqdim ediləcək yayımın məzmunun keyfiyyətindən asılı olacaq.
