Avropa liderləri Ukrayna üçün sülh planı ilə bağlı təcili danışıqlardan sonra ABŞ ilə münasibətlərdə "kritik an" barədə xəbərdarlıq ediblər. Böyük Britaniyanın Baş naziri Kir Starmer, Fransa Prezidenti Emmanuel Makron və Almaniya Kansleri Fridrix Merz ABŞ Prezidenti Donald Trampı müharibəyə son qoymaq üçün "intensiv işə" davam etməyə çağırıblar...
Poliqon xəbər verir ki, hər üçü söhbətdən sonra bəyanat yayaraq deyiblər: "Bu, Ukrayna, onun xalqı və Avroatlantik bölgəsinin ümumi təhlükəsizliyi üçün kritik bir andır".
The Telegraph qəzetinin yazdığına görə, Tramp söhbət zamanı avropalı həmkarları ilə "bəzi olduqca sərt sözlər" mübadiləsi apardığını etiraf edib. Materialda deyilir ki, Amerika lideri, əgər real sülh perspektivi yoxdursa, bu həftəsonu Ukrayna Prezidenti Volodimir Zelenski və Avropa liderləri ilə görüşdə iştirak etməkdən çəkindiyini bildirib.
"Hamısı çox yaxşı liderlər, mənim yaxşı dostlarımdır və biz Ukraynanı olduqca sərt müzakirə etdik. Görəcəyik nə olacaq. Davam etməzdən əvvəl cavab gözləyirik. Düşünürəm ki, insanlarla bağlı bəzi fikir ayrılıqlarımız var idi və bunun hara aparacağını görəcəyik", deyə o əlavə edib.
Tramp jurnalistlərə bildirib ki, başqa bir boş görüşə vaxt itirmək istəmir: "Onlar istəyirlər ki, bu həftəsonu Avropada görüşə gələk. Onların təklifindən asılı olaraq qərar verəcəyik. Vaxt itirmək istəmirik".
Bu yaxınlarda Zelenski ABŞ maliyyə naziri Skott Bessant, Trampın kürəkəni Cared Kuşner və dünyanın ən böyük idarəetmə şirkəti olan "BlackRock"un rəhbəri Larri Fink ilə virtual görüş keçirib. Onlar Trampın sülh planı çərçivəsində Ukraynanın iqtisadi inkişafı və müharibədən sonrakı bərpasını müzakirə ediblər. Zelenski qeyd edib: "Düzgün yanaşma ilə Ukraynada uğurla həyata keçirilə biləcək bir çox ideya var".
Bu danışıqlar Zelenskinin Britaniyada Avropa liderləri ilə böhran danışıqlarından sonra baş tutub - bu, medianın məlumatına görə, Rusiyaya böyük üstünlük verən Trampın sülh planını xilas etmək cəhdidir.
Görüşdən sonra Zelenski liderlərin ABŞ-ın müharibəni bitirmək planına qarşı əks təklif hazırladıqlarını bildirib. Ukrayna rəsmiləri ölkənin şərqini Rusiyaya vermək üçün Kiyevə artan təzyiqdən qorxurlar. Lakin mənbələr The Telegraph-a bildiriblər ki, ABŞ hələ ərazi güzəştlərini nəzərdən keçirmək üçün kifayət qədər təhlükəsizlik zəmanəti verməyib. Daha əvvəl Trampın razılığa gəlmək üçün "Milad son tarixi" təyin etdiyi də bildirilmişdi.
Avropa liderlərinin ABŞ prezidenti ilə telefon danışığı zamanı ABŞ təhlükəsizlik zəmanətləri məsələsini qaldırdıqları güman edilir.
Poliqon.info
