ain.az bildirir, Operativ MM portalına istinadən.
Cənub-Şərqi Asiya Dövlətləri Assosiasiyasının (ASEAN) xarici işlər nazirlərinin Tayland və Kamboca sərhədində yaranmış gərgin vəziyyətin müzakirəsi məqsədilə xüsusi görüşü dekabrın 22-də keçiriləcək.
"Operativ Məlumat Mərkəzi-OMM" xəbər verir ki, bu barədə Malayziya Xarici İşlər Nazirliyi məlumat yayıb.
“The Star” qəzetinin yazdığına görə, xüsusi görüşün keçirilməsi ilə bağlı qərar dekabrın 11-də Kamboca və Tayland arasındakı münasibətlərdəki vəziyyətin həlli istiqamətində səylər çərçivəsində qəbul olunub.
Qərar Malayziyanın baş naziri Ənvər İbrahim, Kambocanın baş naziri Xun Manet və Taylandın baş naziri Anuthin Çanvirakun arasında aparılan müzakirələrdən sonra verilib.
Qəzetin məlumatına görə, görüş əvvəlcə dekabrın 16-na planlaşdırılsa da, Banqkokun müraciəti əsasında dekabrın 22-nə təxirə salınıb.
Bundan əvvəl ABŞ prezidenti Donald Tramp Tayland və Kamboca liderlərinin 24 saat ərzində hərbi əməliyyatları dayandırmaq və sülh razılaşmalarının icrasına qayıtmaq barədə razılığa gəldiklərini açıqlamışdı. Malayziyanın baş naziri isə iki ölkə arasındakı sərhədə ASEAN müşahidəçi qrupunun göndərilməsini təklif edib.
Qeyd edək ki, dekabrın 7-də Kamboca–Tayland sərhədi boyunca atıcı silahlardan istifadə olunmaqla silahlı toqquşmalar baş verib. Tayland Kral Ordusunun məlumatına görə, Kamboca qüvvələri səhər tezdən sərhəd bölgəsində Tayland mövqelərini atəşə tutub. Tayland Hərbi Hava Qüvvələri isə cavab olaraq Kambocanın hərbi infrastrukturuna zərbələr endirib. Toqquşmalar nəticəsində itkilərin olduğu bildirilib. Hər iki ölkədəki Rusiya səfirlikləri rusiyalı turistlərə sərhəd bölgələrinə səfər etməmək tövsiyəsi verib.
Sonrakı hadisələr barədə daha çox məlumat almaq üçün ain.az saytını izləyin.
