Almaniya kansleri bu qərarın artıq qəbul edildiyini və yaxın perspektivdə dəyişməyəcəyini bildirib...
Poliqon xəbər verir ki, Almaniya kansleri Fridrix Merts Ukrayna prezidenti Volodimir Zelenski ilə birgə keçirdiyi mətbuat konfransında Rusiyaya məxsus aktivlərin Avropada dondurulma müddəti ilə bağlı mövqeyini açıqlayıb. Kanslerin sözlərinə görə, Rusiyanın Avropa ölkələrində yerləşən maliyyə aktivləri uzun müddət ərzində dondurulmuş və istifadəsiz vəziyyətdə saxlanılacaq.
Merts vurğulayıb ki, bu məsələ ilə bağlı siyasi qərar artıq ötən həftə qəbul olunub və söhbət qısa müddətli tədbirdən deyil, davamlı və strateji xarakter daşıyan addımdan gedir. Onun sözlərinə görə, Avropa tərəfi bu yolla Moskva üzərində iqtisadi və siyasi təzyiq mexanizmlərini qorumaqda qərarlıdır.
Mətbuat konfransı Almaniya hökumətinin rəsmi internet saytı vasitəsilə canlı yayımlanıb. Rəsmi Berlin Rusiyaya qarşı sanksiya siyasətinin Ukraynadakı münaqişə və beynəlxalq hüququn pozulması fonunda davam etdiriləcəyini bildirir. Bu çərçivədə dondurulmuş aktivlərin taleyi Avropa İttifaqının ümumi mövqeyi ilə uzlaşdırılır və onların mümkün istifadəsi ilə bağlı müzakirələr hələ də davam edir.
Poliqon.info
