ABŞ Prezidenti Donald Tramp vətəndaşlarının ABŞ-a girişi qadağan edilən ölkələrin siyahısını genişləndirib.
AzPost bildirir ki, bu barədə Ağ Evin veb saytında yayımlanan məlumatda deyilir.
Siyahıya Burkina Faso, Mali, Niger, Cənubi Sudan və Suriya daxildir. Qadağa Fələstin Muxtariyyəti tərəfindən verilən sənədlərin sahiblərinə də şamil edilir.
Bundan əlavə, ABŞ hakimiyyəti vətəndaşlarının qismən giriş məhdudiyyətlərinə məruz qaldığı ölkələrin siyahısını genişləndirib. Buraya 15 ölkə – Anqola, Antiqua və Barbuda, Benin, Kot-d’İvuar, Dominika, Qabon, Qambiya, Malavi, Mavritaniya, Nigeriya, Seneqal, Tanzaniya, Tonqa, Zambiya və Zimbabve daxildir.
Tramp administrasiyası bu ölkələrdə korrupsiyanın geniş yayıldığını və sakinlərin saxta sənədlərə sahib olduğunu bildirib.
İyun ayında Tramp Əfqanıstan və İran da daxil olmaqla 12 ölkənin vətəndaşlarının ABŞ-a girişini qadağan edən sərəncam imzalayıb və Kuba, Venesuela və Türkmənistan da daxil olmaqla daha yeddi ölkənin vətəndaşları üçün qismən giriş məhdudiyyətləri tətbiq edib.
Ağ Ev noyabr ayında 19 ölkədən olan əcnəbilərin yaşıl kartlarını yenidən nəzərdən keçirəcəyini açıqlayıb. Tramp “bütün üçüncü dünya ölkələrindən” miqrasiyanı dayandıracağına söz verib.
Məhdudiyyətlər əvvəllər ABŞ ilə əməkdaşlıq etmiş Əfqanıstan vətəndaşının noyabrın sonlarında Ağ Evin yaxınlığında iki Milli Qvardiya əsgərinə atəş açmasından sonra elan edilib.
