“Zenit” Sankt-Peterburq komandasının məşqçisi Sergey Semak və həyat yoldaşı Münhen Hava Limanı gömrük idarəsində Aİ sanksiyaları ilə qadağan edilmiş və vahid qiyməti 300 avrodan çox olan ayaqqabı, eynək və şərf kimi əşyaları gətirməyə cəhd etdiklərinə görə saxlanılıblar. Əşyalar müsadirə edilib və cütlük cərimələnib.
Hafta.az yazır ki, hadisə məşqçinin həyat yoldaşı Anna Semakın Telegram paylaşımı vasitəsilə üzə çıxıb. O yazıb ki, cütlük Münhenə tibbi səbəblərdən gəlib və qayıdarkən hava limanında ayaqqabıları, eynəkləri və şərfləri üçün vergisiz (ƏDV geri qaytarılması) müraciət ediblər və bundan sonra saxlanılıblar. Əşyaları müsadirə edilib və cərimə olunublar.
Tax Global Consulting şirkətinin Moskva ofisinin direktoru Eduard Savulyak bildirib ki, cütlük illərdir Aİ-də qüvvədə olan bir qaydadan xəbərsizdirlər. 2022-ci ilin mart ayında qüvvəyə minən və sanksiyaların bir hissəsi olan bu qaydaya əsasən, vahid qiyməti 300 avrodan çox olan lüks malların Aİ ölkələrindən Rusiyaya ixracı qadağandır. Qayda əsas ehtiyaclar və ya uşaq əşyalarına şamil edilmir.
Savulyak vəziyyətlə bağlı belə şərh verib: "Əgər onlar Rusiya pasportları ilə könüllü olaraq vergisiz rejimə müraciət etməsəydilər, bu, yəqin ki, baş verməzdi. Əgər avropalı bir məmur vergisiz geri ödəməni təsdiqləsəydi, bu, sanksiyaların pozulması olardı və həmin məmur cəzalandırıla bilərdi. Bu səbəbdən də onlar özlərini buna məcbur etdilər”.
Savulyak gömrük məmurlarının hər kəsi sistematik şəkildə yoxlamadığını, lakin diqqət çəkənlərin yoxlanıla biləcəyini söyləyib. O, Rusiya vətəndaşlarına aşağıdakı məsləhətləri verib: “300 avro həddi: Aİ-dən çıxarkən vahid qiyməti 300 avrodan çox olan və "lüks" hesab edilə bilən məhsullarla diqqətli olun”.
