Göz sağlamlığının qorunması və görmənin normallaşdırılması üçün optik eynəklər ən effektiv vasitələrdən biri sayılır. Adətən bu məhsullar digər gündəlik aksessuarlardan nisbətən baha qiymətə satılır. Lakin bazarda qiyməti 2000-3000 manat arasında dəyişən optik eynəklərə də rast gəlinir ki, bu da istehlakçılarda haqlı suallar yaradır. Bu cür yüksək qiymətli eynəklər adi modellərdən nə ilə fərqlənir? Onların bu qədər baha olmasının səbəbi nədir?
Məsələ ilə bağlı “Yeni Sabaha”a danışan oftalmoloq Paşa Qəlbinur yüksək qiymət hər zaman əla keyfiyyət demək deyil:
“Həmin qiymət aralığında olan optik eynəklərlə indiyədək qarşılaşmamışam. Bu səbəbdən onların real təsiri və effektivliyi barədə konkret fikir bildirməyim çətindir. Ümumiyyətlə isə nəzərə almaq lazımdır ki, bazarda hər bir satıcı optik eynəkləri istənilən qiymətə təklif edə bilər və yüksək qiymət hər zaman yüksək keyfiyyət demək deyil”.
Həkim optik eynək almaq istəyənlərə belə tövsiyə verib:
“Həddindən artıq baha qiymətə optik eynək almağa tələsməsinlər. Eyni funksiyanı yerinə yetirən, dəfərlər ucuz və keyfiyyət baxımından qənaətbəxş olan optik eynəklər şəhərin demək olar ki, bütün apteklərində mövcuddur. Seçim edərkən əsas diqqət qiymətə deyil, eynəyin tibbi göstəricilərə uyğunluğuna və həkim məsləhətinə yetirilməlidir”.
Qeyd edək ki, premium eynəklər çox vaxt fərdi ölçülərə uyğun hazırlanır. Pupil məsafəsi, üz quruluşu və gündəlik istifadə vərdişləri nəzərə alınaraq seçilən bu modellər standart eynəklərlə müqayisədə daha komfortlu olur. Ancaq qiymət fərqində marka amili də mühüm rol oynayır. Tanınmış dünya brendləri dizayn, imic və moda elementi baxımından eynəyi təkcə tibbi vasitə deyil, eyni zamanda aksesuar kimi təqdim edir. Bu isə məhsulun bazar dəyərini artırır. Lakin mütəxəssislər qeyd edirlər ki, hər bahalı eynək mütləq şəkildə digərlərindən qat-qat üstün demək deyil. Orta qiymət seqmentində də keyfiyyətli material və düzgün optik göstəricilərə malik modellər mövcuddur.
Aytac Əliyeva
Telegram kanalımız
