2025-ci ildə Hökumət aşağı sərnişindaşıma tarifləri səbəbindən yaranmış zərərləri kompensasiya etmək üçün Şirkətə 42 milyon 662 min manat subsidiya ayırmışdır.
Bu barədə Marja.az "Bakı Metropoliteni" QSC-nin 31 dekabr 2024-cü il tarixində başa çatan il üzrə Maliyyə Hesabatları və Müstəqil Auditor Hesabatına istinadən xəbər verir.
Qeyd edilib ki, 2025-ci ildə Şirkət Hökumətdən əsas tikinti və təmir işlərinin maliyyələşdirilməsi, vaqonlar kimi yeni əsas vəsaitlərin alınması və infrastrukturun inkişaf etdirilməsi məqsədilə 73 milyon 630 min manat kapital vəsaiti almışdır. 20 fevral 2025-ci il tarixində Şirkət Maliyyə Nazirliyindən ilin sonunda qaytarılmaq şərti ilə 244 milyon 800 min faizsiz kredit almışdır.
24 iyul 2025-ci il tarixində Şirkətin Tikinti bölməsi onun funksiyalarının ixtisaslaşmış təşkilatlara ötürülməsi məqsədilə ləğv edilmişdir. Qeyd edilib ki, bu addım tikinti idarəçiliyində çevikliyi, səmərəliliyi və müasirləşməni artırmaqla yanaşı, korporativ strukturu sadələşdirmək və idarəetmə xərclərini azaltmaq məqsədi daşıyır.
Rəqəmsal İnkişaf və Nəqliyyat Nazirliyinin Kollegiyası sərnişindaşıma xidmətlərinin keyfiyyətinin artırılması məqsədilə 1 oktyabr 2025-ci il tarixindən etibarən sərnişindaşıma tarifinin 50 qəpikdən 60 qəpiyə qaldırılmasını təsdiq etmişdir.
