Norveçdə aparılan yeni tədqiqat göstərib ki, uşaqlarda və yeniyetmələrdə fıstıq allergiyası ehtimalı olanlar üçün açıq fıstıq paketinin qoxusuna məruz qalmaq adətən təhlükəsizdir və ciddi allergik reaksiyaya səbəb olmur.
Redaktor.az xəbər verir ki, Haukeland Universitet Xəstəxanasında 323 uşaq və yeniyetmə üzərində aparılan sınaqda 300 qramlıq fıstıq paketi burun altına 10 dəqiqə saxlanılıb. İştirakçıların çoxu heç bir ciddi simptom yaşamayıb. Sadəcə, 3%-dən azında ölçülə bilən simptomlar, 12%-dən azında isə yüngül narahatlıqlar müşahidə olunub. Bunlara asqırma, burun tutulması, dəri qaşıntısı və yüngül tənəffüs narahatlığı daxildir. Dörd iştirakçı tibbi yardım alıb, amma heç kim xəstəxanaya yerləşdirilməyib.
Tədqiqatın müəllifləri bildiriblər ki, bu cür sadə və təhlükəsiz sınaq klinik praktikada, xüsusilə ailələrə fıstıq allergiyası və hava yolu ilə təmas barədə məsləhət verərkən faydalı ola bilər.
Buna baxmayaraq, tədqiqatın bəzi məhdudiyyətləri var: iştirakçıların heç birində fıstıq allergiyası rəsmi, ikiqat kor, plasebo-nəzarətli testlə təsdiqlənməyib və sınaq real həyatda baş verə biləcək uzunmüddətli təmasları əks etdirməyə bilər.
Xədicə BAXIŞLI
