Ukrayna hərbi kəşfiyyatı Rusiyanın qərbindəki ciddi şəkildə qorunan bir hava bazasına gizli şəkildə sızaraq iki qırıcı təyyarəni məhv edib.
Hücum nəticəsində dəyəri təxminən 100 milyon dollar olan iki Rusiya Su-30 təyyarəsi istifadəyə yararsız vəziyyətə düşüb. Ukrayna hərbi kəşfiyyatı əməliyyatın birbaşa anqarın içərisində baş verdiyini bildirib.
Paylaşılan şəkillərdə təyyarənin quyruq nömrələri, kabinələrin daxili hissələri və ən azı bir təyyarənin alov içində qaldığı göstərilir. Hücumu həyata keçirən agent hava bazasına gizli şəkildə daxil olub və səssizcə də oradan çıxıb.
Ukrayna mediasının məlumatına görə, Lipetsk yaxınlığındakı hava bazasına edilən hücumun məqsədi hətta cəbhə xəttindən yüzlərlə kilometr aralıda yerləşən bazaların belə təhlükə altında olduğunu nümayiş etdirmək olub. Bildirilir ki, əməliyyat planlaşdırılması iki həftə çəkib.
Məhv edilən təyyarələr Sovet istehsalı olan, iki mühərrikli Su-30 qırıcı təyyarələridir. Ukrayna əvvəlcə bir Su-30 və bir Su-27-nin vurulduğunu açıqlayıb, daha sonra vurulan hər iki təyyarənin Su-30 olduğunu bildirib.
Əvvəllər də Rusiya ərazisinə pilotsuz uçuş aparatları ilə hücum edən Ukrayna əsas bazalarda çoxsayda təyyarə vurmuşdu. Ukrayna-Rusiya münaqişəsi hava üstünlüyünün tam əldə edilmədiyi bir toqquşmaya çevrilib. Hər iki tərəf bir-birinin qırıcı təyyarələrini vuraraq cəbhə xəttində irəliləyişi ləngitməyə çalışır.
TAHİR
