ABŞ Ədliyyə Nazirliyi amerikalı maliyyəçi Ceffri Epşteynin işi ilə bağlı təxminən 700 min səhifə sənədi yaxın bir həftə ərzində yoxlayaraq ictimaiyyətə açıqlamağı planlaşdırır.
News365.az xəbər verir ki, bu barədə "Axios" portalı məlumat yayıb.
Məqalədə qeyd olunur ki, prezident Donald Tramp administrasiyasının qiymətləndirməsinə görə, Epşteyn işi üzrə bütün materialların dərcinin tamamlanması üçün təxminən bir həftə vaxt lazımdır. Mənbələrin bildirdiyinə görə, Ədliyyə Nazirliyi indiyədək bu işlə bağlı təxminən 750 min sənədi artıq açıqlayıb və sənədlərin yoxlanılmasında 200-ə yaxın əməkdaş iştirak edir.
Axios yazır ki, administrasiya daxilində bu mövzuya medianın davamlı marağı müəyyən narazılıq doğurur. Mənbələrdən biri bildirib ki, həm Konqresin addımlarından, həm də icra hakimiyyətinin cavab tədbirlərindən ciddi narazılıq var və mövzunun gündəmdən düşməməsi əlavə narahatlıq yaradır. Digər mənbə isə vurğulayıb ki, uzun illər mediada əsas mövzu sayılmayan Epşteyn işi indi bir çox KİV üçün əsas xəbər başlığına çevrilib.
Daha əvvəl açıqlanan sənədlərdən, xüsusilə, Donald Trampın Epşteynə məxsus təyyarə ilə səkkiz dəfə uçduğu məlum olur. Tramp bunu əvvəllər inkar edib. Bununla belə, Axios qeyd edir ki, bu fakt prezidentin hər hansı cinayətdə iştirakını sübut etmir. Demokrat konqresmenlər isə sentyabr ayında Epşteynə ünvanlandığı iddia edilən və guya 20 ildən çox əvvəl Tramp tərəfindən imzalanmış məktubu dərc ediblər. Tramp həmin məktubla əlaqəsinin olmadığını dəfələrlə bəyan edib.
Konqres demək olar ki, yekdilliklə Ədliyyə Nazirliyini Epşteyn işi üzrə bütün materialları dərc etməyə məcbur edən qanun layihəsini qəbul edib və Tramp bu sənədi imzalayıb.
Xatırladaq ki, Ceffri Epşteyn 6 iyul 2019-cu ildə Nyu-York ştatında həbs edilmişdi. Prokurorluğun məlumatına görə, o, 2002–2005-ci illərdə Manhettendəki evində yaşı 14-dən başlayan onlarla azyaşlı qızın iştirakı ilə cinayətlər törədib. Epşteynin çevrəsinə ABŞ və digər ölkələrdən olan yüksək vəzifəli şəxslər, iri biznes nümayəndələri və şou-biznes ulduzları daxil olub. O, 2019-cu ilin avqustunda həbsxanada intihar etdikdən sonra cinayət təqibi dayandırılıb. Epşteynin tanışları arasında ABŞ-ın 42-ci prezidenti Bill Klinton və Donald Tramp da olub.
