“Koçaryan dövründə Rusiya Zəngəzurda dəmiryolunu icarəyə götürmüşdü. Ermənilər vaxtilə Zəngəzur dəhlizində dəmiryolu tam şəkildə söküb, relslərinə qədər İrana satdılar. Hələ də başa düşmürəm 42-43 kilometr dəmiryolu niyə söküblər. Amma maraqlıdır ki, Rusiya ilə müqavilə imzalananda artıq o dəmiryolu sökülmüşdü, ya yox?” Bunu Ajans.az-a açıqlamasında Azərbaycanın sabiq XİN rəhbəri Elmar Məmmədyarov deyib. Zəngəzur dəhlizi ilə bağlı Rusiya və İrandan gələn son açıqlamalar barədə danışan sabiq nazir bildirib ki, İran sırf gəlir əldə edəcəyi üçün Zəngəzur dəhlizinə qarşı çıxır: “Zəngəzur dəhlizi ermənilərə daha çox lazımdır, nəinki Azərbaycana. Biz artıq İranla Araz dəhlizi ilə bağlı saziş bağlamışıq. İran ona görə etiraz edir Zəngəzur dəhlizinə, istəyir öz ərazisindən keçsin. Çünki vergilər yığacaq, İranın mövqeyi sırf pula görədir. ABŞ hərbçilərinin gəlməsi də səbəbdir, amma birinci puldur”. AZAL-ın təyyarəsinin vurulmasından sonra Rusiyanın vədlərini yerinə yetirməməsindən danışan Elmar Məmmədyarov qeyd edib ki, Çikaqo Konvensiyasına görə, bu cür qəzaların olarkən 1 il ərzində araşdırılmalı və yekunlaşmalıdır: “Daha sonra bu məlumatı bütün aviaşirkətlərə göndərirlər ki, gələcəkdə belə hadisələr olmasın. Mən də inanıram ki, Rusiya lazımi addımlar atacaq. Rusiya istəsə də, istəməsə də, maneçilik törədə bilməz. Bu, Konvensiyanın bəndlərindən biridir”.
