Moskva 20 maddəlik sənədi danışıqlar üçün başlanğıc nöqtəsi sayır, lakin NATO-nun genişlənməsi, Ukraynanın neytral statusu və sanksiyaların ləğvi ilə bağlı boşluqların doldurulmasını istəyir...
Poliqon xəbər verir ki, Rusiya ABŞ tərəfindən təqdim edilmiş son sülh planına bir sıra əsas dəyişikliklərin edilməsində israrlıdır. Bloomberg agentliyinin Kremlə yaxın mənbəyə istinadən yazdığına görə, Ukrayna və ABŞ tərəfindən hazırlanmış 20 maddəlik sənəd Moskva üçün yalnız gələcək danışıqların başlanğıc nöqtəsi kimi qiymətləndirilir, çünki planda Rusiya üçün vacib sayılan bir çox müddəalar yer almır və bir sıra açıq suallara cavab verilmir.
Mənbənin sözlərinə görə, Moskva mövcud sənədi kifayət qədər tipik Ukrayna planı hesab edir, lakin buna baxmayaraq, onu soyuqqanlı şəkildə öyrənməyə hazırdır. Kreml üçün əsas narahatlıq doğuran məsələlərdən biri NATO-nun gələcəkdə şərqə doğru genişlənməsinə qarşı təminatların verilməməsidir. Eyni zamanda, Ukraynanın Avropa İttifaqına üzv olması halında neytral statusunun necə qorunacağı da Moskva üçün aydın deyil.
Bildirilir ki, planda Rusiyanın müharibədən sonrakı dövrdə Kiyevin silahlı qüvvələrinə və istifadə edə biləcəyi silah növlərinə dair tələb etdiyi məhdudiyyətlər öz əksini tapmayıb. Bundan başqa, Ukraynada rus dilinin statusu ilə bağlı konkret və hüquqi cəhətdən təminatlı müddəaların olmaması da Kremlin iradları sırasındadır.
Mənbə əlavə edib ki, Rusiya üçün sanksiyaların hansı şərtlərlə və hansı mərhələdə ləğv ediləcəyi, eləcə də Qərbdə dondurulmuş yüz milyardlarla dollar dəyərində Rusiya dövlət aktivlərinin taleyi məsələlərinə aydınlıq gətirilməsi xüsusi əhəmiyyət daşıyır. Moskva bu mövzular üzrə dəqiq və hüquqi öhdəliklərə əsaslanan mexanizmlər görmədən hər hansı yekun razılaşmanı mümkün saymır.
Poliqon.info
