BAKI, 26 dekabr. TELEQRAF
ABŞ Prezidenti Donald Trampın aparat rəhbəri Syuzi Uaylsın son açıqlamaları Vaşinqton siyasi dairələrində geniş müzakirələrə səbəb olub. Analitiklər onun bu çıxışlarını Trampdan məsafə saxlamaq və şəxsi siyasi irsini qorumaq cəhdi kimi qiymətləndirirlər.
Teleqraf xəbər verir ki, "Vanity Fair" jurnalında dərc olunan geniş müsahibədə Uayls Trampı “alkoqolik xarakterli şəxsiyyətə malik” kimi təsvir edib, onun qisasçılıq meyllərinə diqqət çəkib. O, vitse-prezident Cey Di Vensi “konspirasiya nəzəriyyəçisi”, milyarder İlon Maskı isə “çox qəribə fiqur” adlandırıb.
Ağ Ev tarixində bu posta gələn ilk qadın olan Uayls iddia edib ki, müsahibədən sitatlar məqsədli şəkildə seçilərək hücum xarakterli yazı hazırlanıb. Tramp və yaxın çevrəsi onu açıq şəkildə müdafiə etsə də, məqalə Uaylsın administrasiyadakı gələcəyi ilə bağlı sualları artırıb.
"The Guardian" yazır ki, siyasi şərhçilərdən bəziləri hesab edir ki, bu açıqlamalar təsadüfi deyil. Trampa müxalif “Lincoln Project” təşkilatının həmtəsisçisi Rik Uilson bildirib ki, Uayls uzunmüddətli siyasi təcrübəyə malikdir və dediklərinin nəticələrini yaxşı anlayır. Onun fikrincə, Uayls tarix qarşısında özünü sığortalamağa çalışır.
Syuzi Uayls uzun illər kölgədə işləyən siyasi texnoloq kimi tanınıb. Ronald Reyqan administrasiyasından başlayaraq Florida siyasətində mühüm rol oynayıb, Trampın 2016 və 2024 kampaniyalarında əsas fiqurlardan biri olub. O, Trampın impulsiv davranışlarını açıq tənqidlə deyil, şəxsi nüfuzu və inandırma yolu ilə cilovlamağa çalışması ilə seçilib.
Ekspertlərin fikrincə, Uayls Trampın ilk prezidentlik dövründəki aparat rəhbərləri ilə müqayisədə daha stabil idarəçilik qurmağa nail olub. Bununla belə, onun prezidentə acı həqiqətləri demək kimi əsas vəzifəni nə dərəcədə yerinə yetirdiyi mübahisə mövzusudur.
Uayls özü isə mövqeyini belə ifadə edib: “Mən nə təşviq edənəm, nə də kiməsə kor-koranə xidmət edən. Vaxt göstərəcək ki, nə qədər effektiv olmuşam.”
Tənqidçilər isə hesab edir ki, o, Trampın sərt miqrasiya siyasəti, federal qurumların zəiflədilməsi və prezident səlahiyyətlərinin genişləndirilməsi prosesində məsuliyyətdən kənarda qala bilməz.
