ain.az, Redaktor.az saytına istinadən bildirir.
Son dövrlər antidepresant dərmanlarına marağın və istifadənin artması diqqət çəkir. Mütəxəssislər bildirirlər ki, bu tendensiya bir sıra sosial, psixoloji və tibbi amillərlə bağlıdır.
Redaktor.az bu barədə xarici mətbuatın araşdırmasına istinadla xəbər verir.
Həkimlərin sözlərinə görə, cəmiyyətdə psixi sağlamlığa münasibət dəyişib. Artıq insanlar psixoloji problemlərlə bağlı mütəxəssisə müraciət etməyi daha normal qəbul edirlər. Depressiya və təşviş pozuntuları müvəqqəti əhval düşkünlüyü kimi deyil, real xəstəlik kimi qiymətləndirilir. İqtisadi çətinliklər, qeyri-müəyyənlik, artan iş yükü və xroniki yuxusuzluq isə insanlarda uzunmüddətli yorğunluq, motivasiya itkisi, narahatlıq və yuxu problemlərinin yaranmasına səbəb olur.
Mütəxəssislər qeyd edirlər ki, antidepresantlar artıq təkcə psixiatrik xəstəliklərin deyil, bir sıra digər tibbi problemlərin müalicəsində də istifadə olunur. Bu dərmanlar xroniki ağrılar, miqren, qıcıqlanmış bağırsaq sindromu və yuxu pozuntuları zamanı da təyin edilə bilir. Bu isə onların ümumi istifadəsinin artmasına təsir göstərir.
Digər tərəfdən, bəzi hallarda antidepresantların həkim məsləhəti olmadan əldə edilməsi də artımı sürətləndirən amillərdən sayılır. Psixoloji yardıma çıxışın çətinliyi fonunda insanlar özlərini müalicə etməyə üstünlük verirlər ki, bu da sağlamlıq üçün ciddi risklər yarada bilər.
Həkimlər xəbərdarlıq edirlər ki, antidepresantların nəzarətsiz istifadəsi yan təsirlərə, asılılıq riskinə və xəstəliyin gizlədilməsinə səbəb ola bilər. Bu səbəbdən də mütəxəssislər bu cür preparatların yalnız həkim məsləhəti ilə qəbul edilməsini tövsiyə edirlər.
Nuriyyə NATİQQIZI
Daha ətraflı məlumat və yeniliklər üçün ain.az saytını izləyin.
