Kiyev, 26 dekabr, AZƏRTAC
Əslində, bu gün biz Bakı ilə Vaşinqton arasında ikitərəfli münasibətlərin inkişafını görürük. Buna görə də, əslində, Azərbaycanın bundan sonra inkişafının hər hansı şəkildə məhdudlaşdırılması yolverilməzdir. Bu, çox güman ki, hüquqi cəhətdən bürokratik səhvdir.
Bu fikri AZƏRTAC-a müsahibəsində ukraynalı politoloq Aleksandr Kovalenko bildirib.
Onun sözlərinə görə, Prezident Donald Tramp Bakı ilə münasibətlərə açıqdır. Son vaxtlar qeyd etdiyimiz kimi, onun Azərbaycan lideri İlham Əliyevlə kifayət qədər yaxşı əlaqəsi var.
“Bu baxımdan, əlbəttə ki, bu günə qədər faktiki olaraq köhnəlmiş və artıq sadəcə yersiz olan 907-ci düzəlişin ləğvi çox mühüm bir addım olacaq”, - deyə o əlavə edib.
A.Kovalenkonun fikrincə, bu, zamana bağlı məsələdir: “İstənilən Qərb demokratiyası, özünü mütərəqqi və inkişaf etmiş kimi göstərsə də, çox vacib bir mənfi cəhətə malikdir. Bu, bürokratik komponentdir və o, bəzən çox uzun müddətə uzana bilər. Düşünmürəm ki, bu, Azərbaycanın inkişafı, Bakı ilə ABŞ arasında əməkdaşlıq və Ermənistanla indi məhz müsbət istiqamətdə hərəkət edən ikitərəfli münasibətlərin bundan sonra da yaxşılaşması üçün hər hansı bir maneəyə çevriləcək. İrəvanın seçdiyi vektor düzgündür və o, həm Azərbaycanın, həm də Ermənistanın maraqlarına uyğundur. Bu, Mərkəzi Asiya, Avropa və ABŞ arasında regionda daha qlobal inkişaf və müəyyən əsas təsir məsələsidir”, - deyə ukraynalı ekspert vurğulayıb.
Emil Hüseynli
AZƏRTAC-ın xüsusi müxbiri
Kiyev
