BAKI, 29 dekabr. TELEQRAF
Kolumbiyanın Amazon bölgəsi son illər silahlı qruplar və mütəşəkkil cinayət şəbəkələri üçün böyük biznes məkanına çevrilib.
Teleqraf "The Guardian"a istinadən xəbər verir ki, ekspertlərin bildirdiyinə görə, 2016-cı ildə hökumətlə FARC arasında sülh sazişindən sonra yaranan boşluqdan istifadə edən yeni silahlı qruplar meşələri qıraraq minlərlə kilometr qeyri-qanuni yol çəkib və regionda nəzarəti ələ alıb.
Kolumbiya Amazonunun 42 faizini əhatə edən ərazilərdə 2018-ci ildən bəri 8 min kilometrdən çox qanunsuz yol salındığı bildirilir. Bu yollar narkotik, qızıl, ət, ağac və digər resursların qaçaqmalçılığı üçün istifadə olunur və meşələrin kütləvi məhvinə səbəb olur.
Məlumata görə, hazırda Amazonun şimal-qərb hissəsində 17-yə yaxın silahlı qrup fəaliyyət göstərir və regionun bələdiyyələrinin təxminən 70 faizinə nəzarət edir. Hüquq-müdafiə təşkilatları vəziyyəti silahlı qruplar, kartellər və biznes maraqları arasında formalaşmış “makro-kriminal şəbəkə” kimi xarakterizə edir.
Rəsmi statistikaya əsasən, Kolumbiyada 2001–2024-cü illər arasında 56 min kvadrat kilometrə yaxın meşə örtüyü itirilib. Amazon bölgəsində mal-qaranın sayı son səkkiz ildə iki dəfə artaraq 3,2 milyona çatıb.
Ekspertlər problemin əsas səbəblərindən birinin sülh sazişinin tam icra edilməməsi olduğunu bildirir. Qeyd olunur ki, dövlətin regionda zəif mövcudluğu silahlı qrupların güclənməsinə və torpağın spekulyativ biznes obyektinə çevrilməsinə şərait yaradıb.
