ABŞ və Ukrayna liderləri razılaşmaya çox yaxın olduqlarını bildirirlər...
Poliqon xəbər verir ki, ABŞ prezidenti Donald Tramp Ukrayna prezidenti Vladimir Zelenski ilə daha bir telefon danışığının planlaşdırıldığını açıqlayıb. Onun sözlərinə görə, növbəti danışıq sabah baş tutacaq. Tramp bu barədə Zelenski ilə Florida ştatındakı Mar-a-Laqo iqamətgahında keçirilən danışıqlardan sonra təşkil olunan birgə mətbuat konfransında məlumat verib.
ABŞ prezidenti bildirib ki, bugünkü görüş zamanı tərəflər gündəmdə olan məsələlərin təxminən 95 faizini müzakirə ediblər. Tramp vurğulayıb ki, danışıqlar gözləniləndən daha məhsuldar keçib və bir çox detallar üzərində razılıq əldə olunub.
“Biz məqsədə çox yaxınıq, bəlkə də son dərəcə yaxınıq. Çoxları bunun mümkün olmadığını deyirdi, amma biz böyük detallara qədər irəlilədik. Sabah bu prosesi davam etdirəcəyik”, – deyə Donald Tramp qeyd edib.
Müşahidəçilərin fikrincə, Tramp və Zelenski arasında intensivləşən təmaslar ABŞ–Ukrayna münasibətlərində yeni mərhələnin formalaşdığını göstərir. Xüsusilə təhlükəsizlik, siyasi koordinasiya və gələcək addımların razılaşdırılması baxımından bu danışıqların mühüm əhəmiyyət daşıdığı bildirilir.
Poliqon.info
