Qazaxıstanın sabiq prezidenti Nursultan Nazarbayevin Moskvaya səfəri və prezident Putinlə görüşü Astanada birmənalı qarşılanmayıb.
AzPost kaztag.kz-a istinadən bildirir ki, bir sıra deputatlar Nazarbayevin xarici səfərlərinə qadağa qoyulmasını tələb ediblər.
Parlamentin deputatı Yermurat Bapi milli təhlükəsizliyi qorumaq üçün dövlət sirlərinə malik keçmiş yüksək vəzifəli məmurların xaricə səyahətini qanunvericiliklə tənzimləməyi təklif edib.
“Bu, necə də təlaşlı bir tələsiklikdir?! Bu, sadəcə bir vaxtlar xalqa hökmranlıq edən və əmr verən, amma indi onların onu qorumayacağını başa düşən bir insanın alçaldıcı davranışıdırmı? Əlbəttə ki, bu cür dilənçilik Qazaxıstan və ya qazaxlar üçün narahatlıqdan irəli gəlmir, həmişəki kimi şəxsi maraqları təmin etmək üçün bir istəkdir. Buna görə də, dövlət sirlərini bilən şəxslərin (keçmiş prezident, nazir və ya digər vəzifəli şəxs olsun) milli təhlükəsizliyi təmin etmək məqsədilə xaricə səyahət etmə imkanını tənzimləyən qanuna həqiqətən ehtiyac var”, – deyə o, Facebook səhifəsində yazıb.
Bapi bunu Çindəki kimi mühacirəti məhdudlaşdıran qanunun beynəlxalq öhdəliklərə və dövlətlərarası konvensiyalara nə dərəcədə ziddiyyət təşkil edə biləcəyi kontekstində soruşduğunu aydınlaşdırıb. O əlavə edib ki, parlament üzvləri də dövlət sirri ilə bağlı tələblərə əməl etməyə borcludurlar.
“Milli təhlükəsizlik maraqları naminə onun və Kojamjarov kimi digərlərinin “qırmızı xətti” müəyyən etmək mümkün olmazdımı? Kremlin belə bir addımın siyasi nəticələrini necə qəbul edəcəyini bilmirəm, amma keçmiş prezidentin cəhdlərini Qazaxıstanın dövlət hakimiyyəti orqanlarına və xalqına qarşı güc nümayişi kimi qəbul edə bilərikmi?”, – deyə deputat yekunlaşdırıb.
