Səyyad Mirzəyev
YAP Ağdam rayon təşkilatının əməkdaşı
31 dekabr – Dünya Azərbaycanlılarının Həmrəyliyi Günü Azərbaycan xalqının milli kimliyinin, birlik ruhunun və bərabərliyə əsaslanan dövlətçilik düşüncəsinin parlaq təzahürüdür. Bu əlamətdar gün dünyanın müxtəlif ölkələrində yaşayan milyonlarla azərbaycanlını ortaq tarix, dil, mədəniyyət və milli maraqlar ətrafında birləşdirən mənəvi körpü rolunu oynayır.
Dünya Azərbaycanlılarının Həmrəyliyi Gününün əsası ümummilli lider Heydər Əliyevin təşəbbüsü və siyasi iradəsi ilə qoyulmuşdur. Məhz onun uzaqgörən siyasəti nəticəsində milli həmrəyliyin ideoloji əsasları formalaşdırılmış, xaricdə yaşayan azərbaycanlıların təşkilatlanması və milli maraqlar ətrafında bir araya gəlməsi dövlət siyasətinin prioritet istiqamətlərindən birinə çevrilmişdir. Bu tarixin rəsmiləşdirilməsi Ümummilli lider Heydər Əliyevin adı ilə bağlıdır. Onun təşəbbüsü ilə 1991-ci ilin 16 dekabrında Naxçıvan Muxtar Respublikası Ali Məclisi Milli Həmrəylik və Birlik Gününün təsis olunması barədə qərar qəbul etdi. Bundan cəmi doqquz gün sonra Azərbaycan Respublikası Ali Sovetinin Milli Şurası hər il dekabr ayının 31-nin Azərbaycanlıların Həmrəylik Günü elan olunması barədə sərəncam verdi. Beləliklə, bu tarix dünya azərbaycanlılarının hər il sevinclə qeyd etdikləri milli bayrama çevrildi. Bu gün milli birliyin əsas mahiyyəti yalnız coğrafi sərhədlərlə məhdudlaşmır. 31 dekabr Azərbaycan xalqının harada yaşamasından asılı olmayaraq, bərabər hüquqlara, ortaq dəyərlərə və eyni məsuliyyət hissinə malik olduğunu nümayiş etdirir. Bu, milli maraqların qorunması, tarixi həqiqətlərin beynəlxalq ictimaiyyətə çatdırılması və Azərbaycan dövlətçiliyinin gücləndirilməsi baxımından xüsusi əhəmiyyət kəsb edir.
Prezident İlham Əliyevin rəhbərliyi ilə həyata keçirilən uğurlu daxili və xarici siyasət dünya azərbaycanlıları arasında həmrəyliyin daha da möhkəmlənməsinə xidmət edir. Dövlətimizin artan nüfuzu, ərazi bütövlüyünün və suverenliyinin tam bərpa olunması milli birlik ideyasını real gücə çevirmişdir. Bu gün həm ölkə daxilində, həm də xaricdə yaşayan soydaşlarımız Azərbaycanın qazandığı tarixi nailiyyətlərlə qürur duyur və vahid mövqedən çıxış edirlər.
Dünya Azərbaycanlılarının Həmrəyliyi Günü eyni zamanda, milli-mənəvi dəyərlərin qorunması və gələcək nəsillərə ötürülməsi baxımından da xüsusi önəm daşıyır. Bu gün gənclərə milli kimliyə sadiqlik, vətənpərvərlik və bərabərlik ruhu aşılanır, onların Azərbaycanla mənəvi bağlarının möhkəmlənməsinə töhfə verir. Dünya Azərbaycanlılarının Həmrəyliyi Günü təkcə bayram deyil, milli ideologiyanın, birliyin və bərabərliyin simvoludur. 31 dekabr Azərbaycan xalqının sarsılmaz iradəsini, ortaq məqsədlər naminə bir yumruq kimi birləşmək əzmini və güclü dövlət ətrafında həmrəyliyini bütün dünyaya nümayiş etdirən tarixi gündür.
