ABŞ prezidenti Donald Tramp ABŞ-ın Türkiyəyə F-35 qırıcı təyyarələri satıb-satmayacağı ilə bağlı suala "Biz bunu çox ciddi şəkildə nəzərdən keçiririk" cavabını verib.
ABŞ Prezidenti Donald Tramp və İsrail Baş naziri Binyamin Netanyahu bu gün Floridada Qəzzada atəşkəsin ikinci mərhələsini müzakirə etmək üçün görüşdülər. Görüşdən sonra iki lider mətbuatın suallarını cavablandırdı.
Tramp açıqlamasında dedi: "Mən Prezident Ərdoğanı çox yaxşı tanıyıram və hamınızın bildiyi kimi, o, mənim çox yaxşı dostumdur. Mən ona inanıram və ona hörmət edirəm. Netanyahu da ona hörmət edir."
"Biz bunu ciddi şəkildə nəzərdən keçiririk"
ABŞ Prezidenti Türkiyəyə F-35-lərin satışı ilə bağlı suala cavab olaraq dedi: "Biz bunu ciddi şəkildə nəzərdən keçiririk. Söz verirəm ki, (F-35-lər) İsrailə qarşı istifadə olunmayacaq".
"İranın gücü çox azalıb"
Tramp İranla bağlı açıqlamasında dedi: "Əgər İran raket proqramını inkişaf etdirməyə davam edərsə, mən İrana sürətli hücumu dəstəkləyərdim. Əgər onlar nüvə proqramlarını davam etdirsələr, hücum dərhal olmalıdır. Eşitdiyimə görə, İran gücünü bərpa etməyə çalışır. Əgər belədirsə, biz onları vurmalı olacağıq".
Görüşdən sonrakı mətbuat konfransında İrana toxunan Tramp bildirib ki, "Əgər biz İrana etdiyimizi etməsəydik, Yaxın Şərqdə sülh olmazdı, heç bir müqavilə imzalanmazdı. İranın gücü və nüfuzu çox azalıb. Onlar Yaxın Şərqdə ən böyük təhlükədir".
