“Qarabağ” üçün 2025-ci ilin “11-liy”i

Geridə qoymaqda olduğumuz 2025-ci il futbol üzrə Azərbaycan çempionatının sonuncu qalibi “Qarabağ” üçün əlamətdar oldu.

Arena.az xəbər verir ki, Ağdam klubu 2025-ci ilin 11 ən əlamətdar məqamını açıqlayıb.

“Qarabağ”dan “Flamenqo”ya

Ağdam klubu növbəti səs-küylü transferi gerçəkləşdirib. Parlaq oyunu və qolları ilə azarkeşlərə sevinc bəxş edən Olavio Juninyo “Flamenqo”ya transfer olunub. Avropanın bir sıra klublarının, o cümlədən “Sevilya”nın heyətinə qatmaq istədiyi 28 yaşlı hücumçu Braziliyaya qayıtmağa üstünlük verib. 2023-cü ilin yayından Azərbaycan klubunun formasını geyinən braziliyalı forvard bu müddətdə 81 oyunda 42 qol vurub. O, bu komanda ilə ölkə çempionu olub, çempionatın bombardiri və kubokun qalibi adına yiyələnib.

Ardıcıl 5-ci, tarixdə 12-ci çempionluq

Komanda 2024/2025-ci illər mövsümündə Azərbaycan çempionu olub. Bu, Premyer Liqanın 32-ci turunda rəsmiləşib. “Sabah”ın qonağı olan “Qarabağ” səfər matçından sonra mövsümün sonuna 4 tur qalmış qızıl medalları təmin edib. Bu, ardıcıl 4-cü, klub tarixində 12-ci çempionluq olub. Komanda bunadək 1993, 2013/14, 2014/15, 2015/16, 2016/17, 2017/18, 2018/19, 2019/20, 2021/22, 2022/23, 2023/24 mövsümlərində də çempion olub. Bu, baş məşqçi Qurban Qurbanovla əldə edilən 11-ci qızıl medaldır.

“Qarabağ”dan yeni rekord

2024/25 mövsümünü çempion kimi tamamlayan komanda kubokda da finala qədər irəliləyib. Ardıcıl ikinci dəfə həlledici matça vəsiqə qazanan “Qarabağ” tarixində 12-ci dəfə final həyəcanı yaşayıb. Bununla da komanda turnirin tarixində mütləq rekorda imza atıb. Ağdam klubu Azərbaycan kubokunun finalında ən çox oynayan komanda adına sahib çıxıb.

10-cu dəfə “Qarabağ”lı

Leandro Andrade Premyer Liqada 2024/25 mövsümünün bombardiri olub. Portuqaliyalı yarımmüdafiəçi mövsümdə 15 qol vurub. O, ilk dəfə Premyer Liqanın bombardiri mükafatını qazanıb. Ardıcıl 4-cü, tarixdə 10-cu dəfə bu ada “Qarabağ”ın futbolçusu layiq görülüb.

Tarixi uğur

Azərbaycan futbolu tarixində Çempionlar Liqasının əsas mərhələsinə yüksələn yeganə klub olan “Qarabağ” 2017/18 mövsümündə əldə etdiyi uğuru təkrarlayıb. 8 il əvvəl qitənin ən nüfuzlu klub turnirinin qrup mərhələsinə vəsiqə qazanmış komanda bu dəfə liqa formatlı yarışda iştirak hüququ əldə edib. Pley-offda Macarıstan təmsilçisi “Ferentsvaroş”u mübarizədən kənarlaşdıran komanda bununla da qitənin ən güclüləri ilə daha 8 matç keçirmək imkanı qazanıb.

Prezidentin daimi diqqət və qayğısı

Prezident İlham Əliyev hər zaman olduğu kimi, 2025-ci ildə də Ağdam klubuna dəstəyini nümayiş etdirib. Daim “Qarabağ”a diqqət və qayğı ilə yanaşan dövlət başçısı komanda pley-offda “Ferentsvaroş” səddini keçərək Liqa mərhələsinə çıxdıqdan sonra sərəncam imzalayıb. “Qarabağ” futbol klubuna maliyyə dəstəyi göstərilməsi haqqında sərəncama əsasən, UEFA Çempionlar Liqasının liqa mərhələsinə vəsiqə qazanması ilə əlaqədar Azərbaycan Respublikasının 2025-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan “Qarabağ” futbol klubuna 5 (beş) milyon manat ayrılıb. Maliyyə Nazirliyinə bu sərəncamın 1-ci hissəsində göstərilən məbləğdə maliyyələşməni təmin etmək, Nazirlər Kabinetinə isə sərəncamdan irəli gələn məsələləri həll etmək tapşırılıb. Prezident İlham Əliyev həm “Ferentsvroş”la cavab oyunu, həm də Liqa mərhələsinin “Benfika” və “Kopenhagen” üzərində qazanılan qələbələrindən sonra təbrik paylaşımı da edib.

Azərbaycan futbolunda ilk

Komanda Çempionlar Liqasının əsas mərhələsində qələbə qazanan ilk Azərbaycan təmsilçisi kimi tarixə düşüb. “Qarabağ” buna Liqa mərhələsinin 1-ci turunda imza atıb. Portuqaliyada “Benfika” ilə görüşən komanda 2 qol buraxaraq məğlub duruma düşsə də, Lissabondan əzmkar qələbə ilə dönüb – 3:2. Bu, ölkə futbolu tarixinə Çempionlar Liqasının əsas raundundakı ilk qələbə kimi düşüb.

İki oyun, iki ilk: Bikalyo və Cəfərquliyev tarixə düşdü

UEFA Çempionlar Liqası tarixində ilk dəfə Azərbaycan klubunun futbolçusu oyunun ən yaxşısı seçilib. Yarımmüdafiəçi Pedro Bikalyo Liqa mərhələsinin “Benfika” ilə səfər matçında bu mükafata sahib çıxıb. Növbəti turda da ilk yaşanıb. Elvin Cəfərquliyev bu ada layiq görülən ilk azərbaycanlı futbolçu olub. O, “Kopenhagen”lə ev görüşündə fərqlənib.

Dünya çempionu Bakıda

Komanda UEFA Çempionlar Liqasının Liqa mərhələsində ardıcıl iki ev oyununda xal qazanıb. “Kopenhagen” üzərində qələbənin ardınca rəqib klublararası dünya çempionatının yeni qalibi “Çelsi” olub. İngiltərə klubu ilə başabaş mübarizə aparan “Qarabağ” dünya çempionu ilə sülhə imza atıb. Bu, həm də futbolun yaradıcısı olan İngiltərə təmsilçilərindən alınan ilk xal olub.

İlin ən yaxşıları

Komandanın il ərzində qazandığı nailiyyətlərə görə Gənclər və İdman Nazirliyinin təşkilatçılığı ilə keçirilən Qala mərasimdə də mükafatlandırılıb. Klub 2024/25 mövsümündə Azərbaycan çempionu adını 12-ci dəfə qazanması, ardıcıl 12-ci dəfə avrokubokların əsas mərhələsinə yüksəlməsi, Çempionlar Liqasında ikinci dəfə ən güclülər sırasında yer alması iki mükafatın təqdim olunmasına əsas verib. Bu uğurların nəticəsində “Qarabağ” İlin ən yaxşı kişi komandası seçilib. Baş məşqçi Qurban Qurbanov İlin ən yaxşı kişi məşqçisi adını qazanıb.

“Top-100”də

Komanda Beynəlxalq Futbol Tarixi və Statistikaları Federasiyasının (IFFHS) dünya reytinqində ölkəmizin ən yaxşı təmsilçisidir. 2025-ci ilin yanvarında 81-ci olan “Qarabağ” dekabrdakı cədvəldə planetin 68-ci komandasıdır. “Top-100”də möhkəmlənən komanda noyabrda 65-ci sırada yer alıb. Bu göstərici Avropa və dünyanın bir sıra tanınmış klublarını arxada qoymaq üçün yetərli olub.