Baltik dənizində Finlandiya və Estoniyanı birləşdirən sualtı telekommunikasiya kabeli zədələnib. Hadisədən sonra hərəkətə keçən Finlandiya polisi kabelə zərər verməkdə şübhəli bilinən bir gəmini saxlayıb.
Məlumata görə, gəmi Finlandiya sularında lövbər zənciri endirilmiş vəziyyətdə aşkarlanıb. "Fitburq" adlı və Sent Vinsent və Qrenadin bayrağı altında üzən yük gəmisinin 14 heyət üzvünün hamısı saxlanılıb. Məlumata görə, heyət üzvləri Rusiya, Gürcüstan, Qazaxıstan və Azərbaycan vətəndaşlarından ibarət olub.
Finlandiya mediası əməliyyatın sahil mühafizəsi və xüsusi təyinatlı polis dəstəsi tərəfindən vertolyot dəstəyi ilə həyata keçirildiyini bildirib.
Zədələnmiş sualtı kabel Finlandiyanın paytaxtı Helsinki ilə Estoniyanın paytaxtı Tallinn arasında uzanır. Kabelə dəyən ziyan, Finlandiyanın telekommunikasiya şirkəti “Elisa” tərəfindən aşkar edildiyi kimi, ciddi əlaqə nasazlıqlarına səbəb olub. Həmçinin, İsveçin Arelion şirkətinə məxsus ikinci sualtı kabelin də zədələndiyi bildirilir.
Finlandiya polisi hadisəni "əmlaka ziyan vurmaq cəhdi" və "telekommunikasiya sistemlərinə ciddi müdaxilə" ittihamları ilə araşdırır.
Finlandiya prezidenti Aleksandr Stubb hökumətin hadisələrin gedişini yaxından izlədiyini və ölkənin müxtəlif təhlükəsizlik ssenarilərinə hazır olduğunu bildirib.
2023-cü ilin oktyabr ayından bəri hücumların və zədələnmələrin əksəriyyəti Baltik dənizində baş verib. Açıq mənbə məlumatlarına görə, bu dövrdə ən azı 11 sualtı internet və elektrik kabeli zədələnib.
NATO hərbi komandanları Rusiyanın sualtı internet kabellərinə şübhəli hücumlarının qlobal internet infrastrukturunu risq altına qoyduğu barədə xəbərdarlıq ediblər.
“Telefonica” və “Orange” kimi böyük telekommunikasiya şirkətləri Böyük Britaniya, AB və NATO rəsmilərinə rəsmi xəbərdarlıq məktubları göndərərək son zamanlar baş verən təxribat hadisələrinin artmasının vacib rabitə xidmətlərini təhdid etdiyini bildiriblər.
"Geosiyasi gərginlik artdıqca xarici dövlətlər bizi zəiflətmək üçün asimmetrik üsullar axtarırlar. İnternet kabel şəbəkəmiz getdikcə daha həssas hala gəlir" – deyə şirkətlərin xəbərdarlığında bildirilir.
TAHİR
