Qidalanma mütəxəssisləri gavalı qurusunu həm sağlam, həm də təbii enerji mənbəyi kimi tövsiyə edirlər.
Metbuat.az xəbər verir ki, tərkibində zəngin vitamin və minerallar olan bu quru meyvə xüsusilə payız-qış mövsümündə orqanizm üçün faydalıdır. Gavalı qurusu həzm sisteminin fəaliyyətini yaxşılaşdırır. Tərkibindəki liflər bağırsaqların normal işləməsinə kömək edir, qəbizliyin qarşısını alır və maddələr mübadiləsini sürətləndirir. Bu səbəbdən bağırsaq problemləri yaşayanlar üçün təbii vasitə hesab olunur.Bu məhsul immun sistemini gücləndirir. Gavalı qurusunda olan C vitamini və antioksidantlar orqanizmi virus və infeksiyalardan qoruyur, xəstəliklərə qarşı müqaviməti artırır.Gavalı qurusu ürək-damar sağlamlığı üçün də faydalıdır. Kaliumla zəngin olması qan təzyiqinin tənzimlənməsinə kömək edir, ürək fəaliyyətini dəstəkləyir və damarların elastikliyini qoruyur.Bundan əlavə, gavalı qurusu sümük sağlamlığını möhkəmləndirir. Araşdırmalara görə, tərkibindəki bor və K vitamini sümüklərin möhkəm qalmasına yardım edir və osteoporoz riskini azalda bilər.Enerji verici xüsusiyyəti sayəsində gavalı qurusu yorğunluğu azaldır, gün ərzində daha gümrah olmağa kömək edir. Şəkər ehtiva etsə də, təbii mənşəli olduğu üçün ölçülü miqdarda istifadə edildikdə zərərsiz sayılır.
Mütəxəssislər gavalı qurusunun gündəlik rasiona az miqdarda daxil edilməsini məsləhət görür, xüsusilə də mədə-bağırsaq həssaslığı olan şəxslərə normanı aşmamaq tövsiyə olunur.
