QHT nümayəndələrinin dövlət təltiflərinə təqdim olunması ilə bağlı QHT Agentliyinə səlahiyyət verilib
Azərbaycan Respublikası Prezidentinin imzaladığı “Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin fəaliyyətinin təkmilləşdirilməsi və bununla əlaqədar Azərbaycan Respublikası Prezidentinin bəzi fərmanlarında və sərəncamlarında dəyişiklik edilməsi haqqında” Fərmanla Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin səlahiyyətləri genişləndirilib.
QHT.az xəbər veri ki, Fərmana əsasən, Agentliyin Nizamnaməsinin 3.2.13-cü yarımbəndinə dəyişiklik edilib. Belə ki, “əməkdaşlarını” sözündən sonra “və qeyri-hökumət təşkilatlarının nümayəndələrini” sözləri əlavə olunub, həmçinin həmin yarımbənddə yer alan “onların” sözü “habelə Agentlik əməkdaşlarının” sözləri ilə əvəz edilib.
Yenilənmiş redaksiyaya əsasən, 3.2.13-cü yarımbənd aşağıdakı kimi müəyyənləşdirilib:
- əməkdaşlarını, qeyri-hökumət təşkilatlarının nümayəndələrini dövlət təltiflərinə və digər mükafatlara təqdim etmək, Agentlik əməkdaşlarının həvəsləndirilməsi üçün tədbirlər görmək.
