Uçuşların ləğv edilməsi hallarının sayı artacaq.
QHT.az xəbər verir ki, Avropada hökm sürən sərt qış şəraiti nəqliyyatda ciddi problemlər yaradıb. Qar və güclü külək səbəbindən Amsterdamın Schiphol hava limanında ən azı 700 reys ləğv edilib, 1000-dən çox sərnişin isə gecəni hava limanında keçirməli olub. Rəhbərlik gün ərzində ləğv edilən uçuşların sayının artacağını bildirir.
Fransada da vəziyyət gərgindir: qar və buz səbəbindən baş verən yol qəzalarında 5 nəfər ölüb, Parisin Şarl de Qoll və Orli hava limanlarında 140-a yaxın reys təxirə salınıb, ictimai nəqliyyatda fasilələr yaranıb. Meteoroloji xidmət ölkənin 38 departamentində güclü qar və şaxta ilə bağlı yüksək hazırlıq vəziyyəti elan edib.
Ümumilikdə Arktika hava dalğası Avropada səyahətləri çətinləşdirib, uçuşlar, qatar və avtobus xidmətlərində genişmiqyaslı gecikmə və ləğvlərə səbəb olub.
R.İmanov
