Respublikaçı senator Vaşinqtonun regionda siyasi və hərbi təsirini genişləndirmək niyyətindən danışıb...
Poliqon xəbər verir ki, ABŞ Senatının respublikaçı üzvü Rik Skott Fox Business telekanalına müsahibəsində Vaşinqtonun Latın Amerikasını tam nəzarət altına almaq niyyətində olduğunu bildirib. Onun sözlərinə görə, ABŞ regionda “nizam-intizam yaratmaq” adı altında bir sıra ölkələrə birbaşa və ya dolayı yolla təsir göstərməyi planlaşdırır.
Skottun açıqlamasında deyilir ki, ABŞ Kuba və Nikaraquada mövcud siyasi rejimlərə qarşı daha sərt addımlar atmaq, Kolumbiyada isə yeni prezidentin hakimiyyətə gəlməsinə şərait yaratmaq niyyətindədir. Senatorun fikrincə, bu tədbirlər ABŞ-nin milli təhlükəsizlik maraqları və regionda sabitliyin təmin olunması ilə əsaslandırılır.
Xatırladaq ki, bu həftə ABŞ prezidenti Donald Tramp Kolumbiyada kokain istehsalının artmasını əsas gətirərək, Venesuela ssenarisi üzrə mümkün hərbi əməliyyatın istisna edilmədiyini bildirib. Onun sözlərinə görə, narkotik ticarəti ABŞ üçün birbaşa təhlükə yaradır və Vaşinqton bu təhlükəyə qarşı sərt tədbirlər görməkdə qərarlıdır.
Bundan əvvəl, yanvarın 3-də ABŞ Venesuelaya zərbələr endirib. Hücumlar nəticəsində ölkənin paytaxtı Karakasda və Fort-Tiuna hərbi bazasında partlayışlar qeydə alınıb. Əməliyyatdan sonra Donald Tramp müdaxiləni uğurlu adlandıraraq, ABŞ hərbçilərinin Venesuela prezidenti Nikolas Maduronu və onun həyat yoldaşını ələ keçirdiyini açıqlayıb.
Ağ Evin rəhbəri vurğulayıb ki, Maduronun artıq prezident statusu yoxdur və hakimiyyətin ötürülməsinə qədər Venesuelanın idarəçiliyini ABŞ öz üzərinə götürür. Bu bəyanatlar regionda və beynəlxalq aləmdə ciddi rezonans doğurub, Latın Amerikasında yeni geosiyasi gərginlik dalğasının yarana biləcəyi barədə narahatlıqları artırıb.
Poliqon.info
