Müəllif: Gülnar Əhmədli, Banco.az
Ölkələrdə vətəndaşlıq əldə etməyin getdikcə çətinləşməsi pasportların artan strateji və sosial dəyəri ilə birbaşa bağlıdır. Bu gün bir çox ölkə turistləri və qısa müddətli ziyarətçiləri qəbul etsə də, uzunmüddətli yaşayış icazəsi və xüsusilə vətəndaşlıq üçün ciddi tələblər irəli sürür.
Banco.az xəbər verir ki, dil bilikləri, mədəni inteqrasiya testləri, uzun illər davam edən rezidentura, yüksək maliyyə və iqtisadi şərtlər artıq standart tələblərə çevrilib. Çünki vətəndaşlıq sadəcə bir pasport deyil — o, sosial təminatlara çıxış, səsvermə hüququ, əmək bazarında sərbəstlik və dövlətin diplomatik müdafiəsi deməkdir. Məhz bu səbəbdən dövlətlər vətəndaşlıq qapısını getdikcə daha möhkəm bağlayırlar.
Niyə vətəndaşlıq almağın şərtləri bu qədər sərtləşib?
Hökumətlər demoqrafik balansı qorumağa, sosial rifah sistemlərinin həddindən artıq yüklənməsinin qarşısını almağa və təhlükəsizlik risklərini minimuma endirməyə çalışırlar. Bunun nəticəsi olaraq:
- yaşayış müddəti tələbləri uzadılır,
- ikili vətəndaşlıq məhdudlaşdırılır,
- müraciətlər ciddi və çoxmərhələli yoxlamalardan keçirilir.
Rifah səviyyəsi yüksək olan ölkələrdə vətəndaşlıq çox vaxt yalnız uzunmüddətli və uğurlu inteqrasiya prosesindən sonra mümkün olur.
Dünyada vətəndaşlıq almağın xüsusilə çətin olduğu ölkələr arasında aşağıdakılar yer alır:
- San Marino
- Butan
- Monako
- Yaponiya
- Çin
- İsveçrə
- Finlandiya
- Səudiyyə Ərəbistanı
- Avstriya
- Küveyt
- Şimali Koreya
- Qətər
- Vatikan
- Lixtenşteyn
- Birləşmiş Ərəb Əmirlikləri
Bizi sosial şəbəkələrdən izləyin!!
