İctimaiyyət onları uzun illər modanı, pop mədəniyyəti, siyasəti və xeyriyyəçiliyi birləşdirən yeni nəsil "güc cütlüyü" kimi qəbul edirdi. Lakin Milad şirniyyatının satış kampaniyası zamanı xeyriyyə adı ilə istehlakçıların aldadıldığı barədə ittihamlar onların reputasiyasını bir neçə ay ərzində alt-üst etdi və bu mövzu artıq təkcə şou-biznes yox, həm də siyasət, brendlər və sosial mediaya dair daha geniş müzakirələrə səbəb olub.
Hadisələrin başlanğıcı 2023-cü ildə Ferranjinin "pandoro" adlanan şirniyyatı reklam edərək satışların uşaq xərçənginin müalicəsinə dəstək üçün istifadə olunacağı mesajını verməsi ilə bağlı olub. Lakin araşdırmalar nəticəsində məlum oldu ki, xəstəxanaya ayrılan vəsait satışdan yox, öncədən bağlanmış cüzi ianədən ibarət olub, influencer isə kampaniyadan böyük kommersiya gəliri əldə edib. İtaliyanın Rəqabət Tənzimləmə Orqanı bunu istehlakçıların aldadılması kimi qiymətləndirərək Ferranji və istehsalçı şirkəti cərimələdi. Məsələ sonradan cinayət işinə çevrilərək ağırlaşdırılmış fırıldaq ittihamı ilə Milan məhkəməsinə daşınıb. Prokurorlar 20 aylıq həbs cəzası tələb edir, Ferranji isə günahsız olduğunu deyir və kampaniyanın yaxşı niyyətlə edildiyini bildirir.
Skandalın böyüməsində cütlüyün uzun illər özlərini xeyriyyə təşəbbüsləri, LGBTQ+ hüquqları və sosial ədalət mövzuları ilə bağlaması mühüm rol oynayıb. Bu, onları İtaliyanın ən görünən liberal simalarından birinə çevirmişdi. Baş nazir Corcia Meloni isə bundan istifadə edərək Ferranjini "yanlış rol modeli" kimi təqdim edib və sonradan mediada "Ferranji qanunu" adlandırılan layihəni parlamentə çıxarıb. Layihə influencerlərin reklam və satış davranışlarına daha ciddi nəzarət mexanizmləri gətirir. Maraqlıdır ki, Ferranjinin keçmiş həyat yoldaşı Fedez bu müddətdə sağ-siyasi kəsimə yaxınlaşaraq podkastlarında sağçı siyasətçilərə yer verməyə başlayıb və beləliklə iki fiqurun ictimai mövqeləri də fərqli istiqamətlərə dağıldı.
Pandorogate həm də sosial media mədəniyyətinin hansı təməl üzərində qurulduğuna dair suallar yaradıb. Uzun illər dünyanın müxtəlif ölkələrində influencerlər brendlərlə əməkdaşlıq edərək böyük təsir gücü qazanmış və bir çox hallarda auditoriya onların dediklərini sual etmədən qəbul etmiedibşdi. İtaliyada yaranan hadisə ilk dəfə olaraq bu münasibətə hüquqi, siyasi və etik müstəvidə cavab verilməsinə səbəb olub. Reklam agentlikləri və istehsalçı firmalar artıq influencerlərlə müqavilələr bağlayarkən riskləri daha ciddi ölçür, xeyriyyəçilik mesajları isə daha çox yoxlanılır.
Ferranjinin brend imperiyası hazırda ciddi zərbə alıb: aparıcı moda evləri əməkdaşlığı dayandırıb, reklam layihələri ləğv olunub, o isə mətbuatda demək olar görünmür. Fedez isə özünü yeni auditoriya üçün yenidən təqdim etməyə çalışır. Hadisənin nəticələri İtaliyada böyük rezonans doğursa da, məsələ əslində daha geniş bir tendensiyanı göstərir: sosial media fenomenlərinin reputasiyası çox tez yüksələ, eyni sürətlə də dağıla bilir və bu prosesdə ən böyük risk xeyriyyəçilik, emosional mövzular və ictimai etimad üzərində qurulan kampaniyalarda ortaya çıxır.
