“İmişli”dən qalmaqalla ayrılaraq Premyer Liqanı Birinci Liqanın lideri “Şəfa”ya dəyişən İbrahim Əliyev Sportinfo.az-a müsahibə verib.
- Premyer Liqanı Birinci Liqaya niyə dəyişdin?
- İnkişafım baxımından mənə faydalı olacağını düşünürəm. “Şəfa” da növbəti mövsüm üçün Premyer Liqaya yüksəlməyə çox yaxındır.
- Burada hədəfin nədir?
- İnanıram ki, hər iki tərəf üçün xeyirli olacaq. Düzdü, hazırda komanda Birinci Liqada çıxış edir. Amma əsas liqaya layiq kollektiv olduğunu düşünürəm.
- Amma bizdə dəqiq informasiya var ki, “İmişli”dən qalmaqalla ayrılmısan…
- Xeyr, hansısa hadisə olmayıb. İstəsəniz klubdan da bu barədə məlumat ala bilərsiniz.
- Bəs bir anda ayrılıq qərarı niyə yarandı?
- Oturub danışdıq, bir-birimizi başa düşdük. Oyunlarda az şans alırdım. Sırf bu səbəbdən ayrılmaq qərarına gəldim. Sağ olsun, klub da heç bir etiraz etmədi.
- "Sumqayıt"la görüşün son dəqiqələrində penalı qaçırdığın üçün məşqçilər korpusu ilə aranda yaşanan insident barədə nə deyə bilərsən?
- Məşqçi ilə mənim problemim olmayıb. Aramızda hər hansı dava baş verməyib.
- Niyə məhz həmin görüşdən sonra iştirak ərizəsində adını görmədik?
- Son iki oyunda heyətdə yer almamağım səhhətimlə bağlı olub.
- Bəlkə, elə onda klub səni yola salmaq barədə qərar qəbul edib?
- Xeyr. Mövsümün birinci yarısı başa çatandan sonra ayrılmaq qərarım olub. Rəhbərlik və məşqçilər korpusu ilə birgə verilən ortaq qərardır.
XANOĞLAN İMANOV
