Cey Di Vens Ağ Ev rəhbərliyini Tehranla danışıqlara üstünlük verməyə razı salmağa çalışır...
ABŞ-nin vitse-prezidenti Cey Di Vens prezident Donald Trampı İrana qarşı mümkün hərbi zərbələrdən imtina etməyə və diplomatik danışıqlara başlamağa razı salmağa çalışır.
Poliqon xəbər verir ki, bu barədə “The Wall Street Journal” qəzeti amerikalı rəsmi mənbələrə istinadla məlumat yayıb.
Nəşrin yazdığına görə, Ağ Ev hazırda İranın nüvə proqramının məhdudlaşdırılması ilə bağlı təqdim etdiyi son diplomatik təklifi nəzərdən keçirir. Bu, Trampın hazırkı mərhələdə İrana qarşı yeni hərbi zərbələrin sanksiyalaşdırılmasına meyilli olması fonunda baş verir. Mənbələrin bildirdiyinə görə, Vaşinqton administrasiyası daxilində bu məsələ ətrafında ciddi fikir ayrılığı mövcuddur.
Məlumata əsasən, vitse-prezident Cey Di Vensin rəhbərlik etdiyi bir qrup yüksək vəzifəli köməkçi Tramp administrasiyasında diplomatiyaya üstünlük verilməsini müdafiə edir. Onlar hesab edirlər ki, hərbi qərar qəbul edilməzdən əvvəl Tehranla danışıqlar aparmaq və mövcud diplomatik kanallardan maksimum istifadə etmək məqsədəuyğundur.
“The Wall Street Journal” vurğulayır ki, bu mövqe ABŞ-nin Yaxın Şərq siyasətində mümkün eskalasiyanın qarşısının alınmasına yönəlib və regionda daha genişmiqyaslı qarşıdurma risklərini azaltmaq məqsədi daşıyır. Qəzetin yazdığına görə, Cey Di Vens və onunla həmfikir olan rəsmi şəxslər hesab edirlər ki, İranın nüvə proqramı məsələsində diplomatik həll yolu hələ tam tükənməyib və Vaşinqton bu imkandan istifadə etməlidir.
Poliqon.info
