İrlandiyalı qapıçı Gevin Bazunu “Sauthempton” klubunu tərk edib.
90deqiqe.Az xəbər verir ki, 23 yaşlı qolkiper yaxın altı ayı İngiltərə Çempionşipində çıxış edən digər klub – “Stok Siti”nin heyətində keçirəcək. Bu barədə “dulusçular”ın mətbuat xidməti məlumat yayıb.
Qeyd edək ki, Bazunu “Şemrok Rovers” və “Mançester Siti” klublarının yetirməsidir. O, 2022-ci ildə “Sauthempton”a keçib. “Müqəddəslər” həmin vaxt irlandiyalı qapıçını “Mançester Siti”dən 14 milyon avro qarşılığında transfer etmişdi. “Sauthempton”dakı dövründə Bazunu yalnız bir dəfə icarəyə göndərilib — 2025-ci ilin yazında Belçikanın “Standard” klubuna.
Gevin Bazunu İrlandiya millisinin üzvüdür. 23 yaşına qədər o, milli komandanın heyətində 22 oyuna çıxıb.
Hazırda “Stok Siti” Çempionşip turnir cədvəlində 40 xalla səkkizinci pillədə qərarlaşıb. Komandanın altıncı pillə ilə xal fərqi cəmi bir xaldır.
