Rusiya Premyer Liqasında çıxış edən “Rostov” futbol klubu Beynəlxalq Futbol Federasiyası (FIFA) tərəfindən transfer qadağası ilə üzləşib. Məlumata görə, qadağa klubun növbəti üç transfer qeydiyyat dövrünü əhatə edir və 13 yanvar tarixindən qüvvəyə minib.
Qeyd olunur ki, FIFA hələlik transfer məhdudiyyətinin tətbiq olunma səbəbləri ilə bağlı rəsmi açıqlama yaymayıb. Bu müddət ərzində “Rostov” yeni futbolçuların transferini və qeydiyyatını həyata keçirə bilməyəcək.
Xatırladaq ki, ötən ilin dekabrında yayılan məlumatlarda klubun ciddi maliyyə çətinlikləri yaşadığı bildirilirdi. İddialara əsasən, “Rostov”un qış toplanışlarını keçirmək üçün kifayət qədər vəsaiti olmadığı, ümumi borcun isə 4–5 milyard rubl arasında dəyişdiyi qeyd olunurdu. Eyni zamanda futbolçuların bir qisminin sentyabr–oktyabr aylarından etibarən maaş almadığı da iddia edilirdi. Daha sonra klub rəhbərliyi borcun məbləğinin 1,5 milyard rubl olduğunu açıqlayıb.
Buna baxmayaraq, “Rostov” 2025-ci ilin son oyununda doğma meydanda Kazanın “Rubin” klubunu 2:0 hesabı ilə məğlub edib. Qarşılaşma “Rostov Arena” stadionunda baş tutub. Komanda qış fasiləsinə 21 xalla 11-ci pillədə yollanıb.
