Əməkdar artist Bəhram Bağırzadə sosial şəbəkə hesabında ətirdən istifadə mədəniyyəti ilə bağlı paylaşım edib.
Ölkə.az xəbər verir ki, o, uşaqlıqdan ətirin şəxsi məkanla bağlı çox həssas mövzu kimi təqdim edildiyini xatırladıb.
"Uşaqlıqdan bizə öyrədiblər ki, ətir çox şəxsi bir məsələdir. Demək olar ki, gigiyena kimi. Bu, insanın şəxsi məkanı, bədəni və dünyadakı varlığıdır. Məhz buna görə də bizə həmişə deyirdilər ki, ətir hədiyyə etmək incə məsələdir. Yüz dəfə düşünmək lazımdır, çünki belə bir hədiyyə ilə sən sözün əsl mənasında başqa bir insanın şəxsi məkanına daxil olursan".
Bu gün səhər kiçik, amma çox düşündürücü bir hadisə yaşadım. Saat səkkiz idi, lift, bir neçə insan. Və bir gənc oğlan vardı ki, ətirdən həddindən artıq istifadə etmişdi. Elə bir həddə ki, xoş bir ətir izi yox, narahatlıq hissi yaranırdı. Məsələ ətirin pis olmasında deyildi — sadəcə çox idi və çox yaxın idi.
Burada vacib olan bir sadə həqiqət var: ətir “hamı hiss etsin” deyə deyil. O, “yaxınlaşmaq istəyən hiss etsin” üçündür. Yaxşı ətir qışqırmır, özünü zorla qəbul etdirmir və insanın özündən əvvəl qapalı məkanı doldurmur.
Lift, ictimai nəqliyyat, ofis, səhər saatları — bunlar podium və ya parfümeriya mağazası deyil. İnsanların həssaslığı fərqlidir: kiminsə allergiyası var, kiminsə başı ağrıyır, kiminsə isə səhər tezdən başqa birinin qoxusunu “daşımağa” sadəcə gücü yoxdur.
Məncə, bəzən hamımıza xatırlatmaq lazımdır: ətirdən istifadə etmək də hörmət formasıdır. Özünə və ətrafındakılara hörmət. Başqalarına narahatlıq yaratmayacaq qədər ətirlənmək azadlığın məhdudlaşdırılması deyil, mədəniyyət məsələsidir. Ətir intimdir. Qoy o, qışqırıq yox, pıçıltı olsun",- deyə B.Bağırzadə qeyd edib.
Həmidə İbrahimova
