Yevlaxın İsmayılabad kəndi ərazisində silahlı insident baş verib.
Pravda.az xəbər verir ki, Musavat.com-a daxil olan məlumata görə, sabiq icra başçısı Qoca Səmədovun oğlu Zaur Səmədov “Vinçester” markalı odlu silahdan atəş açaraq tanışını ağır yaralayıb. Yaralı təcili tibbi yardım vasitəsilə Yevlax Rayon Mərkəzi Xəstəxanasına çatdırılıb. Həkimlərin səyi nəticəsində onun həyatını xilas etmək mümkün olub.
Digər məlumata görə, Zaur Səmədov İsmayılabad kəndi ərazisinə it döyüşdürməyə gəlib. Döyüş Zaur Səmədovun itinin uduzması ilə nəticələnib. Bundan qəzəblənən Zaur Səmədov digər itin sahibinə odlu silahdan atəş açmaqla əsəbini sakitləşdirməyə çalışıb.
Qeyd edək ki, Zaur Səmədov Yevlaxın sabiq icra başçısı Qoca Səmədovun oğludur. Xatırladaq ki, Yevlaxın sabiq icra başçısı Qoca Səmədov Dövlət Təhlükəsizliyi Xidməti tərəfindən 2019-cu ildə həbs olunmuşdu. Vəzifə cinayətləri ilə bağlı ittiham edilən sabiq icra başçısı 2023-cü ilin iyul ayında səhhəti ilə əlaqədar cəzasının çəkilməmiş hissəsindən şərti olaraq azadlığa buraxılıb. O, həmin ilin dekabr ayında vəfat edib.
