Müasir dövrün problemləri daha da dərinləşir və onlara yeni çağırışlar əlavə olunur. Dünya münasibətlər sistemində qanunun gücünü güclünün hüququ əvəz edir.
Hafta.az xəbər verir ki, bu sözləri Türkiyə Prezidenti Rəcəb Tayyib Ərdoğan Ankarada Nazirlər Kabinetinin iclasının yekunlarına dair keçirilən brifinqdə deyib.
O, Rusiya–Ukrayna müharibəsinə diqqət çəkərək bildirib ki, gələn ay minlərlə insanın həyatına son qoymuş qanlı qarşıdurmanın beşinci ili başlayır:
“Davam edən səylərə baxmayaraq, barışığa aparan yol hələ də tapılmayıb”.
Dövlət başçısı, həmçinin yeni sınaqlarla müşayiət olunan qarşıdurmaların baş verdiyi İrandakı vəziyyətə də toxunub:
“İranda həyata keçirilməyə çalışılan ssenarini diqqətlə izləyirik. İnanırıq ki, qonşumuz bu günləri geridə qoyacaq. Türkiyə hadisələrin əvvəlindən problemlərin həll yolunun danışıqlar masasından keçdiyi mövqeyini prinsipial şəkildə müdafiə edir. Bütün maraqlı tərəfləri diplomatik rıçaqlardan istifadə etməyə çağırırıq”.
R.T.Ərdoğan Suriyadakı vəziyyətə də münasibət bildirib:
“Türkiyə 8 dekabr inqilabının nailiyyətlərini möhkəmləndirmək üçün səylərini əsirgəmir. 13,5 illik zülm və yüz minlərlə suriyalının həyatına son qoymuş qarşıdurmadan sonra tarixi fürsət yaranıb. Suriya suriyalılara məxsusdur. Qonşu ölkənin birliyi və ərazi bütövlüyünün əhəmiyyəti böyükdür".
Prezident əlavə edib ki, Suriyanın sabitliyi bütün regionun rifahı üçün son dərəcə vacibdir. Prezident vurğulayıb ki, Türkiyənin yerləşdiyi regionda terrorizm dövrü artıq başa çatıb.
