Özbəkistan ABŞ-dakı diplomatik mövcudluğunu genişləndirməyi və hava yollarının sayını artırmağı planlaşdırır. Mövcud nümayəndəliklərə əlavə olaraq, üç yeni konsulluq fəaliyyətə başlayacaq; uçuş şəbəkəsi isə Kaliforniya və Florida istiqamətində genişlənə bilər.
Hafta.az yazır ki, Özbəkistanın ABŞ-dakı səfiri Furkat Sidikov bu barədə sahibkarlarla görüşdə açıqlayıb. Onun sözlərinə görə, onilliklər ərzində Özbəkistanın ABŞ-dakı maraqları əsasən Vaşinqtondakı səfirlik və Nyu-Yorkdakı baş konsulluq tərəfindən təmsil olunub. Bundan sonra Çikaqo, San-Fransisko və Sietldə (Vaşinqton ştatında) yeni konsulluqların açılması planlaşdırılır. Diplomatik şəbəkənin genişləndirilməsi planları 2026-cı ildən Özbəkistana daxil olan ABŞ vətəndaşları üçün vizasız rejim fonunda elan edilib.
Səfir vurğulayıb ki, Özbəkistan regionda ABŞ-la birbaşa hava əlaqələri olan yeganə aviasiya mərkəzi olaraq qalır. Hazırda Nyu-York marşrutu üzrə həftədə 5 uçuş var. Gələcəkdə ABŞ-ın qərb sahilinə və ya cənubuna - Kaliforniya və ya Florida istiqamətində birbaşa uçuşların açılması ilə bağlı müzakirələr aparılır.
Sidikov ABŞ bazarında ölkənin tanıtımına dair mövcud yanaşmaları tənqid edərək, materialların çox hissəsini "şablonlar" adlandırdı. O, tur operatorlarına hədəf auditoriyanın xüsusi ehtiyaclarına uyğun məhsul və təkliflər hazırlamağı məsləhət görüb.
Yeni təşviqat strategiyasının bir hissəsi olaraq, Özbəkistan “National Geographic”lə əməkdaşlığa başlayıb. Bu il kanalın yaradıcı heyətinin Özbəkistanın turizm brendini beynəlxalq auditoriyaya tanıtmaq məqsədi daşıyan sənədli serial çəkmək üçün ölkəyə gəlməsi planlaşdırılır.
Nəhayət, səfir resursların rəsmi tədbirlərə deyil, güclü marketinqə və nüfuzlu qlobal bloqçuların cəlb olunmasına yönəldilməli olduğunu bildirib. Həmçinin qeyd edib ki, Özbəkistan vətəndaşları üçün viza müraciəti prosedurlarının sadələşdirilməsi ilə bağlı ABŞ ilə danışıqlar aparır. Səfir prosesin bir qədər uzun, əsasən ABŞ tərəfinin qərarlarından asılı olacağını söyləyib.
