Dırnaq qırılması bir çox insanın qarşılaşdığı estetik və sağlamlıq problemlərindəndir.
Pravda.az bildirir ki, zəif və tez qırılan dırnaqlar gündəlik həyat keyfiyyətinə də mənfi təsir göstərə bilər. Dırnaq qırılmasının səbəbləri həm daxili, həm də xarici amillərlə bağlı ola bilər.
Dırnaqlar niyə qırılır?
Dırnaqların qırılmasına vitamin və mineral çatışmazlığı, xüsusilə biotin, dəmir, sink və B12 vitamini azlığı səbəb ola bilər. Uzun müddət dırnaq boyaslşı və qalıcı manikür istifadəsi, dırnaqların tez-tez su və kimyəvi maddələrlə təmasda olması da onların zəifləməsinə gətirib çıxarır. Yaşlanma və bəzi hormonal problemlər də dırnaqları daha kövrək edir.
Dırnaqları necə qorumaq olar?
Mütəxəssislər dırnaqların sağlam qalması üçün balanslı qidalanmağı, vitaminlərlə zəngin qidalar qəbul etməyi tövsiyə edirlər. Ev işləri və təmizlik zamanı qoruyucu əlcəklərdən istifadə etmək, dırnaqları mütəmadi olaraq nəmləndirmək qırılmaların qarşısını ala bilər. E vitamini və bitki yağları dırnaq baxımında faydalı hesab olunur. Bundan əlavə, tez-tez dırnaq boyası və qalıcı laklardan istifadə etməmək də dırnaqların bərpasına kömək edir.
Nə zaman həkimə müraciət etməli?
Əgər dırnaq qırılması uzun müddət davam edirsə və evdə görülən tədbirlər effekt vermirsə, mütəxəssisə müraciət etmək tövsiyə olunur. Çünki bu hal bəzi sağlamlıq problemlərinin əlaməti ola bilər.
Əminə Bayramova
