Nottingem Universitetinin alimləri podaqranın müalicəsinin infarkt və insult riskini azalda biləcəyini müəyyən ediblər. Tədqiqatın nəticələri JAMA Internal Medicine jurnalında dərc olunub.
Araşdırma zamanı alimlər podaqra və hiperurikemiya diaqnozu olan yetkin şəxslərin tibbi qeydlərini təhlil ediblər. Podaqra sidik turşusunun oynaq boşluqlarında kristallar şəklində toplanması nəticəsində yaranan, iltihab və güclü ağrılarla müşayiət olunan xəstəlikdir. Hiperurikemiya isə podaqranın əsas səbəbidir, lakin hər zaman bu xəstəliyə keçmir. Bəzi hallarda sidik turşusunun səviyyəsi yüksək olsa da, ağır oynaq zədələnmələri müşahidə olunmur. Ancaq uzun müddət müalicə aparılmadıqda podaqra riski əhəmiyyətli dərəcədə artır.
Alimlər sidik turşusunu azaldan müalicə alan və hədəf göstəricilərə çatan pasiyentlərin xəstəlik tarixçələrini, bu göstəricisi yüksək olaraq qalan şəxslərlə müqayisə ediblər. Əsas diqqət podaqranın müalicəsində ən çox istifadə olunan preparatlardan biri olan allopurinolun qəbuluna yönəlib.
Analiz göstərib ki, sidik turşusunun səviyyəsini tövsiyə olunan həddə endirə bilən pasiyentlərdə beş il ərzində ciddi ürək-damar hadisələri — miokard infarktı, insult və ürək xəstəliklərindən ölüm halları — daha az qeydə alınıb. Ən güclü qoruyucu təsir ilkin mərhələdə ürək-damar riski yüksək olan şəxslərdə müşahidə olunub. Eyni zamanda bu qrupda podaqra tutmalarının sayı da azalıb.
Tədqiqat müəllifləri vurğulayırlar ki, həlledici amil təkcə dərman qəbulu deyil, konkret biokimyəvi nəticənin — sidik turşusunun hədəf səviyyəyə endirilməsinin — əldə olunmasıdır.
