Cebheinfo portalından verilən məlumata əsasən, ain.az bildirir.
Xaricdə fəaliyyət göstərən “söyüş bloqer”lərinin əxlaqazidd davranışları davam etməkdədir.
Şübhəsiz ki, bu şəxslər törətdikləri qanunsuz əməllərə görə məsuliyyətdən yayınmayacaqlar. Azərbaycan Respublikasının Baş Prokurorluğu tərəfindən onlar barəsində istintaq tədbirləri başlanılıb, bəziləri haqqında isə qiyabi məhkəmə hökmləri çıxarılıb.
Bununla belə, həmin şəxslərin hələ də ölkəyə ekstradisiya olunmaması cəmiyyətdə ciddi müzakirələrə səbəb olub. Proses çərçivəsində hansı konkret addımların atıldığı və məsələnin qarşısını alan nüansların nələr olduğu maraq doğrurur.
Məsələ ilə bağlı "Cebheinfo.az"-a açıqlamasında Milli Məclisin deputatı Bəhruz Məhərrəmov bildirib ki, informasiya texnologiyalarının inkişafı, xüsusən süni zəka və "deepfake" təminatlarının yeni mərhələyə qədəm qoyması müsbət tərəfləri ilə bərabər, həm də çoxsaylı mənfi tendensiyalara yol açıb, internet informasiya resurslarında təhqir, böhtan, o cümlədən şərəf və ləyaqəti, işgüzar nüfuzu ləkələyən, bununla da insan hüquq və azadlıqlarının müdafiəsi üçün ciddi təhdid yaradan situasiyaya səbəb olub:
"Əlbəttə, bu imkanlar, eyni zamanda uzun müddətdir xaricdə, ayrı-ayrı kəşfiyyat strukturlarının himayəsi altında anti-Azərbaycan fəaliyyətin tərkib hissəsinə çevrilib, Azərbaycan dövlətinin və Azərbaycan xalqının maraq və mənafeləri əleyhinə informasiya təbliğatında mühüm alət kimi çıxış edən ünsürlər üçün də fürsətə çevrilmiş, onlar öz çirkab söyüş və təhqir kampaniyalarını tam yeni müstəviyə keçirə biliblər.
Lakin məlumdur ki, Azərbaycanın qlobal məqamda nüfuz, güc və imkanları əvvəlki səviyyə ilə müqayisə olunmur və xüsusən Vətən müharibəsi və antiterror tədbirlərindən sonra yaranan yeni geosiyasi status-kvo, habelə Tramp administrasiyası ilə normallaşan münasibətlər fonunda Qərblə əlaqələrin yeni mərhələyə keçməsi, Azərbaycanın Avropanın özünün bir çox dövlətlərinin enerji təhlükəsizliyində, dolayısı ilə milli təhlükəsizliyində rol alması fonunda Azərbaycan cinayət qanunvericiliyində nəzərdə tutulmuş əməllərin məcmusunu törətməsi şübhə doğurmayan həmin şəxslərin məsuliyyətə cəlb edilməsi məsələsi üçün real imkanlar yaradıb".
Deputat qeyd edib ki, Azərbaycan cinayət-prosessual qanunvericiliyində qiyabi mühakimə imkanlarının təsbit edilməsi, habelə insan hüquq və azadlıqlarının müdafiəsi sahəsində beynəlxalq standartların gözlənilməsi şərtilə həmin şəxslərin barəsində cinayət təqibinin həyata keçirilməsi və nəticə etibarilə həmin şəxslərin bəziləri barədə məhkəmə hökmünün olması, digərlərinin isə cinayət təqibinin ittiham hökmü ilə yekunlaşması istiqamətində real addımların atılması həmin şəxsləri himayə edən dövlətləri dilemma qarşısında qoyur:
"Bu isə o deməkdir ki, Azərbaycan məhkəmələrinin insan hüquq və azadlıqlarını, o cümlədən prosessual standartları gözləməklə qəbul etdiyi qərarların icrasını təmin etmək həmin dövlətlərin beynəlxalq hüquqla üzərlərinə götürdükləri öhdəliklərdən biridir.
Əks halda müvafiq subyektlər qlobal miqyasda cinayətkarları müdafiə edən mərkəzlərə çevrilmiş olacaq. Adıçəkilən təhqir, böhtan mexanizmlərinin və bu mexanizmlərin ucuz aləti olan "mühacir blogerlər"in fəaliyyətinin hər hansı formada effekt verməməsi və Azərbaycanın qlobal miqyasda nüfuz və roluna hər hansı formada təsir etməməsi fonunda, təbii ki, heç bir dövlət Bakı ilə bu cür ucuz alətlərə görə münasibətlərini gərginləşdirmək istəməz.
Bu isə o deməkdir ki, barələrində ittiham hökmü çıxarılmış həmin şəxslərin Azərbaycana qaytarılması və məhkəmənin hökmünə müvafiq olaraq cəzasının çəkilməsinin təmin olunması üçün çox gözləmək lazım gəlməyəcək".
Əfsanə Rəcəb
"Cebhrinfo.az"
Açar sözlər:
“Söyüş bloqer”ləri Bəhruz Məhərrəmov
Problemlərinizi bizə yazın, şahidi olduğunuz hadisələri çəkib göndərin
Ən son xəbərləri və yenilikləri almaq üçün ain.az saytını izləyin.
